NATO po përballet me mjedisin më të rrezikshëm të sigurisë
Sekretari i Përgjithshëm i NATO-s, Mark Rutte, ka paralajmëruar se Aleanca po përballet me një situatë gjithnjë e më të ndërlikuar të sigurisë. Ai u ka bërë thirrje Britanisë së Madhe dhe vendeve evropiane të rrisin kontributin e tyre në mbrojtjen e përbashkët.
Gjatë vizitës së tij në Britani të Madhe, Rutte theksoi se NATO-s i nevojitet “më shumë Britani e Madhe dhe më shumë Evropë” për t’iu përgjigjur pasigurive të reja gjeopolitike. “Është thelbësore që forcat tuaja të armatosura të vazhdojnë të ofrojnë fuqinë ushtarake që i nevojitet NATO-s,” deklaroi Rutte gjatë një fjalimi në Ditchley Park, në Oxfordshire.
Sipas tij, vendet evropiane duhet të rrisin investimet në mbrojtje për të siguruar kapacitetet ushtarake të nevojshme për përmbushjen e detyrimeve të Aleancës. Rutte përmendi se për një periudhë të gjatë Evropa ka funksionuar mbi supozimin se Shtetet e Bashkuara do të siguronin pjesën më të madhe të fuqisë ushtarake dhe do të përballonin një pjesë të konsiderueshme të kostove të mbrojtjes.
Ai iu referua gjithashtu marrëveshjes së arritur në samitin e NATO-s në Hagë, ku vendet anëtare ranë dakord për rritjen e shpenzimeve në fushën e mbrojtjes. Ndër faktorët që kanë ndryshuar mjedisin e sigurisë, Rutte përmendi luftën e Rusisë kundër Ukrainës, terrorizmin, Iranin dhe ndryshimet në konkurrencën gjeopolitike globale.