“Kam arritur kufijtë”: Pas suksesit me “Odisea”, fansat e Nolan duhet të presin vite për filmin e radhës. Regjisori: Kam përmbushur ëndrrën
Filmi më i ri i Christopher Nolan, “Odisea”, po shënon një sukses të jashtëzakonshëm në arkë. Megjithatë, fansat e regjisorit britanik do të duhet të bëjnë durim për projektin e tij të radhës, pasi Nolan ka bërë të ditur se do të kalojnë të paktën tre vite para se një tjetër film i tij të shfaqet në ekranin e madh.
Në një intervistë për emisionin “Today” të NBC-së, regjisori u pyet rreth ritmit të tij të punës, duke pasur parasysh se në vitet e fundit ai ka sjellë një film të ri pothuajse çdo tre vjet. Pas “Interstellar” (2014), Nolan prezantoi “Dunkirk” (2017), më pas “Tenet” (2020) dhe “Oppenheimer” (2023), duke ruajtur një cikël të ngjashëm prodhimi.
Ai konfirmoi se edhe për filmin e ardhshëm do të nevojitet një periudhë e gjatë përgatitjeje. Regjisori pranoi se puna për adaptimin e veprës së Homerit, ku ai ka qenë njëkohësisht shkrimtar, regjisor dhe producent, ka qenë ndër sfidat më të mëdha të karrierës së tij.
“Kam arritur kufijtë e qëndrueshmërisë sime dhe mendoj se edhe të gjithë të tjerëve. Është ‘Odisea’; nëse nuk duket e vështirë, atëherë nuk po e bëjmë siç duhet”, u shpreh Nolan.
“Odisea” konsiderohet si një nga projektet më ambicioze të regjisorit, duke pritur të sjellë një version epik të poemës së lashtë të Homerit. Filmi kombinon stilin e tij kinematografik karakteristik me një histori klasike që ka frymëzuar breza.
Për filmin “Odisea”, Nolan theu rekorde duke e xhiruar tërësisht në formatin IMAX 70 milimetërsh. Ai shpjegoi: “Shkova në IMAX dhe thashë: ‘Shikoni, nëse ndonjëherë do ta përmbushim këtë ëndërr për ta xhiruar të gjithë filmin në atë mënyrë, ky është ai. Ky është Odisea’.”
“Odisea” është tashmë në kinema dhe pritet të grumbullojë mbi 257 milionë dollarë fitime në mbarë botën. Ky është hapja e tij më e suksesshme globale që nga “The Dark Knight Rises” (2012), i cili kishte fituar 249 milionë dollarë në debutimin e tij.
Filmi është në kinema dhe në të luajnë aktorë të njohur si Matt Damon, Anne Hathaway, Lupita Nyong’o, Robert Pattinson, Tom Holland, Zendaya, Charlize Theron dhe shumë të tjerë.