Bilanci Tragjik: Shtatë Alpinistë të Vdekur pas një Ortiku në Nepal
Të paktën shtatë alpinistë, përfshirë pesë të huaj dhe dy nepalezë, kanë humbur jetën pasi u bllokuan nga një ortek në një majë të Himalajeve në veri-lindje të Nepalit. Lajmi u bë i ditur nga agjencia e ekspeditës “Seven Summit Treks”.
Incidenti ndodhi të hënën në orën 09:00 sipas orës lokale (03:15 GMT), pranë kampit bazë të malit Yalung Ri, në distriktin Dolakha. Ekipet e shpëtimit kanë arritur të gjejnë dy trupa, ndërsa kërkimet vazhdojnë për pesë alpinistë të tjerë, të cilët besohet se janë varrosur nën dëborë.
Tetë persona të tjerë janë shpëtuar dhe aktualisht ndodhen në kryeqytetin Kathmandu, duke marrë trajtim mjekësor për lëndimet e tyre. Sipas shefit të policisë së qarkut, të gjithë alpinistët ishin pjesë e një grupi që kishte nisur ekspeditën më shumë se një orë para se të ndodhte orteku.
“Trupat e pesë alpinistëve të tjerë të ndjerë mund të jenë 10-15 metra nën dëborë,” tha Mingma Sherpa, kryetar i “Seven Summit Treks”, duke shtuar se “do të duhet kohë për t’i gjetur ata.”
Viktimat përfshijnë dy alpinistë italianë, një kanadez, një gjerman, një francez dhe dy nepalezë që shërbenin si udhërrëfyes.
Zëvendësdrejtori lokal i policisë, Gyan Kumar Mahato, i tha BBC-së të hënën se një helikopter shpëtimi kishte zbarkuar në zonën Na Gaun të Dolakha-s, një zonë që ndodhet pesë orë ecje nga kampi bazë i Yalung Ri.