Momente paniku në një park zbavitës në Itali! Loja “Super Frisbee” del jashtë kontrollit dhe i afrohet një ndërtese.
Një atraksion në një park zbavitës ka shkaktuar shqetësim në Itali, pasi gjatë funksionimit duket se është afruar shumë pranë një ndërtese fqinje.
Bëhet fjalë për “Super Frisbee”, një lojë që ngre dhe rrotullon pasagjerët mbi një disk të madh dhe që është instaluar në kuadër të festimeve për nder të Madonna della Consolazione, në zonën e Reggio Calabria.
Pamjet e atraksionit janë publikuar në rrjetet sociale dhe janë bërë shpejt virale. Në video, disku i madh me pasagjerë shihet teksa lëviz në mënyrë të përsëritur dhe, në një moment, i afrohet shumë ndërtesës që ndodhet pranë tij. Kjo ka ngritur shqetësime lidhur me sigurinë e atraksionit dhe distancën që ai ka nga objekti.
Pamjet kanë shkaktuar reagime dhe diskutime të shumta në rrjetet sociale.
Sipas komitetit të lagjes “Ferrovieri-Pescatori”, autoritetet kompetente kanë kryer një inspektim në vendngjarje për të vlerësuar nëse atraksioni paraqet rrezik dhe në çfarë mase.
Komiteti ka sqaruar se ndërtesa pranë së cilës kalon atraksioni nuk është e banuar, por përdoret si ambient zyrash.
Krahas kontrollit të sigurisë, komiteti ka kërkuar edhe kryerjen e një matjeje zyrtare të nivelit të zhurmës, për të përcaktuar nëse ai qëndron brenda kufijve të përcaktuar nga ligji.
Hetimet dhe verifikimet pritet të përcaktojnë nëse atraksioni plotëson të gjitha kushtet e sigurisë dhe nëse distanca e tij nga ndërtesa përbën problem.