Pentagoni vlerëson rolin e ri udhëheqës të Gjermanisë në mbrojtjen evropiane
Një zyrtar i lartë i Pentagonit ka vlerësuar strategjinë e re të mbrojtjes së Gjermanisë, duke dhënë një deklaratë jashtëzakonisht pozitive. Kjo vlerësim vjen në një kohë kur Shtetet e Bashkuara kanë nisur një rishikim të pranisë së tyre ushtarake në Evropë.
Elbridge Colby, zëvendëssekretar i Mbrojtjes në Pentagon, shkroi në platformën X pas një takimi me inspektorin e përgjithshëm të Bundeswehr-it (ushtrisë gjermane), Carsten Breuer. Sipas tij, me veprimet e saj, Gjermania po pozicionohet si një udhëheqëse kryesore e mbrojtjes konvencionale të Evropës.
Colby, zyrtari i tretë më i lartë në Pentagon, e cilësoi strategjinë e re ushtarake të Gjermanisë si “historike dhe shumë të vlerësuar”, pa dhënë detaje të mëtejshme.
Sipas tij, planet e Gjermanisë, së bashku me angazhimin për të arritur shpejt objektivin e ri të NATO-s për shpenzimet e mbrojtjes prej 5% të Prodhimit të Brendshëm Bruto, do të përshpejtojnë ndjeshëm forcimin e Aleancës dhe aftësinë e saj për të parandaluar kërcënimet.
Pas kërkesave të presidentit amerikan, Donald Trump, që Evropa të marrë më shumë përgjegjësi për sigurinë e kontinentit, vendet anëtare të NATO-s ranë dakord në qershor të vitit 2025 të rrisin shpenzimet e mbrojtjes. Objektivi është kalimi nga minimumi aktual prej 2% të PBB-së në 3.5% deri në vitin 2035. Për më tepër, një shtesë prej 1.5% do të dedikohet për investime të lidhura me sigurinë, siç janë ato në infrastrukturë.
Gjermania synon ta arrijë objektivin prej 5% deri në vitin 2029.
Colby, i cili deklaroi se takimi me kreun e Bundeswehr-it, Breuer, u zhvillua më 23 korrik, shtoi javën e kaluar se ushtria amerikane kishte nisur rishikimin e pranisë së saj ushtarake në Evropë.