“`html
Financial Times: Investimi i familjes Trump në Shqipëri shkakton protesta
Një projekt për ndërtimin e një resorti luksoz në një zonë të pabanuar të Mesdheut, i lidhur me Jared Kushner, dhëndri i ish-presidentit amerikan Donald Trump, ka nxitur protesta në Shqipëri prej një jave. Mijëra qytetarë u mblodhën të enjten në Tiranë për të pestën ditë radhazi, duke mbajtur pankarta kundër qeverisë me mbishkrimin “Ndalni vjedhjen e Shqipërisë” dhe figura flamingosh rozë, të cilët janë kthyer në simbol të lëvizjes. Flamingot gjenden në ligatinat e mbrojtura pranë zonës ku parashikohet zhvillimi i projektit.
Protestat kundërshtojnë resortin e propozuar me vlerë 4 miliardë dollarë, i mbështetur nga Affinity Partners, firma e investimeve e themeluar nga Kushner. Projekti përfshin një zhvillim pranë Zvërnecit, një zonë bregdetare ngjitur me ligatinat, si dhe një resort të nivelit të lartë në Sazan, ishullin e vetëm të Shqipërisë.
Nëse projekti anulohet, ky do të ishte projekti i dytë i familjes Trump në Ballkan që dështon për shkak të kundërshtimit lokal, pas anulimit vitin e kaluar të një plani për një hotel Trump në Beograd, i cili gjithashtu ishte mbështetur nga Kushner.
Bashkëshortja e Kushner, Ivanka Trump, u përball me kritika pas një interviste në podkasti të David Senra, ku ajo përshkroi si ajo dhe bashkëshorti i saj kishin zbuluar ishullin që tani planifikojnë të zhvillojnë. Ajo shprehu magjepsjen për ishullin dhe mundësinë për ta zhvilluar atë “me shumë kujdes dhe maturi”.
Prokuroria e Posaçme kundër Korrupsionit në Shqipëri ka njoftuar se po shqyrton ndryshimet e vitit 2024 në statusin e mbrojtur të zonës dhe në pronësinë e tokës, të cilat i kanë hapur rrugë zhvillimit të planifikuar. Projekti mori miratim paraprak në fund të vitit 2024 dhe llogaritet të ketë një vlerë prej mbi 4 miliardë dollarësh, më shumë se 10% të prodhimit të brendshëm bruto vjetor të Shqipërisë.
Zyrtarët argumentojnë se projekti mund të tërheqë turistë me fuqi të lartë shpenzuese dhe të nxisë më tej industrinë e turizmit. Ndërkohë, grupet mjedisore dhe kundërshtarët tjerë të projektit theksojnë se planet kërcënojnë ekosisteme të ndjeshme dhe nuk janë shqyrtuar sa duhet.
Kryeministri Edi Rama ka deklaruar se investimi nuk do të ndalet dhe se ai po vijon me “pronarë të rinj dhe legjitimë”. Ai akuzoi protestuesit se po veprojnë kundër interesave ekonomike të Shqipërisë dhe se disa prej tyre janë ndikuar nga fushata dezinformimi në rrjetet sociale. Ishulli i Sazanit mbetet pronë shtetërore, ku Affinity Partners ka marrë statusin e investitorit strategjik, ndërsa zonat bregdetare aty pranë janë blerë nga investitorë nga Katari.
Asher Abehsera, kryetar i Sazan Real Estate Development, kompania që po punon për projektin, ka deklaruar se fokusi mbetet “administrimi i përgjegjshëm, përmirësimi mjedisor, krijimi i vendeve të punës dhe ndërtimi i një vlere afatgjatë për komunitetet lokale”, duke shtuar se respektojnë proceset publike dhe institucionale.
Lutfi Dervishi, analist i pavarur, ka vlerësuar se protestat në Tiranë pasqyrojnë një pakënaqësi më të gjerë ndaj administratës së Ramës dhe i ka cilësuar ato si “paqësore dhe të qëndrueshme”.
“`