Qiraja Afatgjatë Fiton Terren, Ndërsa Ajo Ditore Po Humb Avantazhin
Kalimi masiv i apartamenteve drejt dhënies me qira ditore ka ulur ofertën për banim afatgjatë dhe ka ushtruar presion të fortë mbi çmimet në Tiranë. Gjatë gjashtëmujorit të parë të vitit 2026, qiraja mesatare për apartamentet 1+1 arriti në 590 euro në muaj, ndërsa për banesat 2+1 në 954 euro. Kjo përbën një rritje përkatësisht prej 4.4% dhe rreth 26% krahasuar me një vit më parë.
Në disa zona qendrore, rritja e qirave ishte dukshëm më e fortë, ndërsa edhe periferia po ofron gjithnjë e më pak alternativa të përballueshme. Agjentët imobiliarë lidhin shtrenjtimin me kombinimin e kërkesës së lartë, ofertës së kufizuar dhe orientimit të shumë pronave drejt platformave të tilla si Airbnb.
Gjatë gjashtëmujorit të parë të vitit 2026, në të gjithë vendin numëroheshin rreth 27.7 mijë njësi të listuara për qira ditore, një shifër markante në krahasim me vetëm 3 mijë pak vite më parë. Rreth 5.5 mijë prej tyre ishin të vendosura në Tiranë. Kjo zhvendosje ka reduktuar ndjeshëm stokun e disponueshëm për familjet, studentët dhe profesionistët që kërkojnë kontrata afatgjata.
Megjithatë, duket se avantazhi ekonomik i qirasë ditore po zbehet. Në Tiranë, e ardhura mesatare nga Airbnb ishte rreth 25.5 euro në ditë gjatë gjashtëmujorit të parë të vitit 2026, e cila përkthehet në afërsisht 765 euro në muaj. Kjo shumë raportohet përpara zbritjes së kostove operative, të tilla si energjia, uji, pastrimi, mirëmbajtja, komisionet e platformave, amortizimi dhe taksat. Në praktikë, të ardhurat neto mund të jenë dukshëm më të ulëta.
Në të njëjtën kohë, qiratë afatgjata kanë arritur në shumë zona nivele të afërta ose madje më të larta. Për shembull, në Astir, një apartament 1+1 jepet mesatarisht me 550 euro në muaj, në Zogun e Zi me 620 euro, në ish-Bllok me 700 euro dhe pranë stadiumit “Air Albania” me rreth 800 euro. Për apartamentet 2+1, qiratë në zonat më të kërkuara variojnë nga 900 deri në 1,500 euro në muaj.
Këto shifra po ndryshojnë sërish llogaritë e pronarëve. Qiraja afatgjatë ofron të ardhura më të qëndrueshme, pa periudha boshllëku dhe me kosto më të ulëta administrimi. Nga ana tjetër, qiraja ditore kërkon angazhim të vazhdueshëm dhe i nënshtrohet sezonalitetit, konkurrencës dhe luhatjeve të rezervimeve.
Formalizimi i mëtejshëm po përshpejton këtë ndarje. Individët që japin prona me qira përmes Airbnb dhe Booking detyrohen të deklarojnë të ardhurat në sistemin DIVA dhe të paguajnë një tatim prej 15%. Administrata Tatimore ka bërë të ditur se gjatë vitit 2024 u identifikuan mbi 8,400 individë dhe subjekte me të ardhura nga Airbnb, me rezervime në vlerë rreth 3.8 miliardë lekë.
Për pronarët me vetëm një ose dy apartamente, kostot dhe detyrimet e reja po e bëjnë qiranë afatgjatë një opsion më të thjeshtë dhe më të parashikueshëm. Ndërkohë, qiraja ditore po përqendrohet gjithnjë e më shumë tek operatorët profesionistë dhe agjencitë që menaxhojnë disa prona njëkohësisht.