“`html
Kryeministri Rama i përgjigjet protestuesve në CNN: Flet për luftë hibride, Shqipëria po sulmohet nga armiqtë dhe konkurrenca
Kryeministri Edi Rama është shprehur në një intervistë për CNN International lidhur me protestat që kërkojnë dorëheqjen e tij për çështjen e Zvërnecit. Ai i ka cilësuar protestat dhe raportimet si pjesë të një “lufte hibride”, duke pretenduar se Shqipëria po sulmohet nga “armiq dhe konkurrencë e fortë në rajon”, si dhe nga fushata dezinformimi në rrjetet sociale.
“Nuk ka protesta në të gjithë Shqipërinë. Ka një protestë në kryeqytet. Ne jemi në një luftë hibride. Shqipëria është nën sulm nga armiq që i njohim shumë mirë. Është nën sulm nga konkurrenca shumë e fortë në pjesën tonë të Mesdheut. Është nën sulm nga mijëra e qindra mijëra profile të rreme (bots) që janë krijuar për të shkaktuar gjithë këtë stuhi”, ka deklaruar Rama.
Kryeministri ka mohuar kategorikisht ekzistencën e një projekti në Zvërnec, duke i cilësuar raportimet si “lajme të rreme”. Ai shtoi se nuk ka asnjë projekt aktual, por po zhvillohen vlerësime të ndikimit mjedisor, duke angazhuar arkitektë dhe specialistë të nivelit të lartë.
Në një moment të debatit, Rama ka shpjeguar se:
- “Ai po flet për një projekt që nuk e ka parë askund tjetër përveçse në imazhe të rreme të krijuara dhe të shpërndara në rrjetet sociale në Shqipëri, sepse ne jemi në një luftë hibride.”
- “Përsëri, nuk ka ende një projekt. Nuk ka një projekt.”
- “Deri sa të më tregoni projektin, duhet të më dëgjoni, sepse nuk ka projekt.”
- “Grupi që nuk përbëhet vetëm nga Jared Kushner dhe Ivanka Trump, por edhe nga investitorë të tjerë shumë të respektuar, ka angazhuar pesë nga arkitektët më të mirë në botë sot: Kengo Kuma nga Japonia, Bjarke Ingels nga Danimarka, Emre Arolat nga Turqia, K-Studio nga Greqia, Jean Nouvel nga Franca. Këta po punojnë së bashku me inxhinierë të nivelit më të lartë për mjedisin dhe specialistë të ndikimit social. Ndërkohë është angazhuar edhe një nga kompanitë më të mëdha konsulente për vlerësimin e ndikimit mjedisor.”
- “Sfida është të provohet se zhvillimi dhe natyra jo vetëm që mund të bashkëjetojnë, por se natyra dhe zhvillimi kanë nevojë për njëra-tjetrën.”
- “Njerëzit meritojnë të jetojnë në një lloj tjetër mjedisi, ku mund ta shijojnë natyrën dhe njëkohësisht t’i tregojnë respekt.”
- “Vlerësimi i ndikimit mjedisor është ende duke u kryer.”
- “Hetimi ka të bëjë me një nga pronarët e tokës. Është tokë private dhe një nga pronarët e ka shitur pronën, e cila është blerë përmes transaksioneve bankare krejtësisht transparente. Hetimi është për atë çështje. Nuk është për investimin. Nuk është për projektin. Nuk është për Kushnerin. Nuk është për Trumpin. Nuk është për asgjë nga ato që po hidhen në këtë përzierje për të krijuar lajmin sensacional se Shqipëria është një vend ku po vrasim flamingot.”
Lidhur me protestat, Rama theksoi se nuk ka protesta në të gjithë Shqipërinë, por vetëm në kryeqytet. Ai shtoi se në këtë protestë ka njerëz me qëllime të mira, të rinj të interesuar për mjedisin, por të keqinformuar.
“Nuk ekziston diçka e tillë si “ishulli i familjes Trump”. Nuk ekziston diçka e tillë si familja e presidentit amerikan që po merr nën kontroll zonat e mbrojtura me flamingo,” përfundoi ai.
“`