“`html
Mediat britanike pasqyrojnë deklaratat e Ramës nga Londra: Kryeministri shqiptar na përmblodhi Brexit, kritikoi Farage dhe ironizoi Braverman
Mediat britanike i kanë dhënë jehonë deklaratave të kryeministrit shqiptar, Edi Rama, të bëra gjatë vizitës së tij në Londër. Sipas tyre, Rama ka dhënë atë që cilësohet si “përmbledhja më e saktë ndonjëherë për Brexit”, duke kritikuar gjithashtu “teatralitetin” e Nigel Farage-it.
Gjatë një vizite në Chatham House për një samit të fokusuar te trafiku i qenieve njerëzore përmes Ballkanit, Edi Rama vlerësoi qeverinë e Keir Starmer për progresin në luftën kundër emigracionit të paligjshëm. Ai theksoi se bashkëpunimi kundër krimit të organizuar dhe migracionit të paligjshëm po funksionon në një “mënyrë fantastike” dhe beson se është gjithashtu “e qëndrueshme”.
Nga ana tjetër, tabloidi “Mirror” shkruan se, sipas “The London Economic”, Rama theksoi se është e lehtë për figura si Farage të jenë kritikë, duke shtuar: “Kemi parë më shumë se një herë se puna e qeverisë është diçka krejtësisht e ndryshme nga poezia e opozitës.” Ai e cilësoi udhëheqësin e Reformës (Referuar Nigel Farage) si një “pasqyrë problemesh që ka njëfarë kapaciteti teatral për të qenë tërheqës”.
Rama dha gjithashtu një përmbledhje “të fortë” të ndikimit që Brexit ka pasur në Mbretërinë e Bashkuar. Duke iu referuar ironisë së Brexit-it, i cili u promovua si një mënyrë për të kontrolluar imigracionin, por që sipas tij ka pasur efektin e kundërt, ai tha:
- “Disa i quajnë ato varka të vogla, disa i quajnë varka të Brexit-it. Dhe dikush pyet veten pse e latë Evropën. Ju u larguat nga Evropa sepse donit më pak anije, dhe keni më shumë anije.”
- “E latë Evropën sepse donit më shumë investime. Keni më pak investime.”
- “E latë Evropën sepse donit më shumë lumturi. Tani jeni në depresion.”
Rama gjithashtu sulmoi ish-sekretaren e brendshme, Suella Braverman, për komentet e mëparshme që ajo bëri për shqiptarët. Gjatë kohës së saj në qeveri, Braverman kishte deklaruar se Partia Laburiste do të “lejonte të gjithë kriminelët shqiptarë të vinin në këtë vend”. Duke iu referuar këtyre komenteve, Rama tha se ishte ende i zemëruar me Braverman, duke shtuar me ironi: “Meqë ra fjala, ku është ajo?”
“Mbaje mend, e di, mos u ngatërro me shqiptarët sepse nëse të mallkojnë, thjesht zhdukesh,” përfundoi ai.
“`