“`html
Rama: Çfarë problemi ka që ndodhin protestat? Ato nuk janë matje force. Kam një kontratë me shqiptarët që do e respektoj
Kryeministri Edi Rama, gjatë një interviste ekskluzive në “Shqipëria Live”, u shpreh për protestat e vazhdueshme në Tiranë, duke theksuar se ato nuk përbëjnë një matje force. Ai gjithashtu siguroi se do të respektojë “kontratën” që ka me shqiptarët, duke iu referuar votës së marrë në zgjedhjet e kaluara.
“Nuk ishte dilemë, por një mundësi në kushtet kur gjërat që jam këtu bëhen të pamundura. Unë kam një kontratë me shqiptarët dhe do e respektoj deri në fund, nuk diskutohet”, deklaroi Rama.
Duke komentuar protestat, ai shtoi: “Çfarë problemi ka që ndodhin protestat? Protestat janë pjesë e jetës demokratike në një vend të lirë. Protestat nuk janë matje force dhe as nuk maten me numra. Ato maten me qëllime, kauzë dhe kërkesa. Fakti që unë dhe PS jemi votuar me një shumicë domethënëse nuk e përjashton faktin që një pjesë e njerëzve jetojnë në këtë vend, kanë një opinion tjetër dhe duan ta shprehin. Këto janë dy gjëra që nuk e përjashtojnë njëra tjetrën.”
Kryeministri Rama ritheksoi se nuk ka një leje ndërtimi në Zvërnec. “Nuk është dhënë dhe nuk ka leje ndërtimi në zhvillimin në Zvërnec. Nuk është ngatërresë e institucioneve, është ngatërresë e juaja. Më nxirr lejen, kjo nuk është leje, është një paragraf mbi një dokument që ka një sërë lejesh. Ajo nuk është leje ndërtimi, ka një sërë pikash”, tha ai.
Në vijim, duke iu kthyer pyetjes lidhur me një dokument të publikuar, Kryeministri Edi Rama sqaroi: “Leja e ndërtimit është një formular krejt tjetër, ka një sërë firmash edhe e imja në të. Për të 139 herë në këto ditë, nuk ka një leje ndërtimi. Është e habitshme si zhvillohet kjo ngjarje.”
“`