“`html
Blerjet e valutës dhe kredia, rritja e ofertës së parasë shënoi rekord të ri në korrik
Rritja e ofertës së parasë shënoi një rekord të ri historik në muajin korrik, duke u ndikuar nga kreditimi i shëndetshëm i ekonomisë dhe nga blerjet e konsiderueshme të valutës nga Banka e Shqipërisë.
Statistikat e Bankës Qendrore tregojnë se në fund të muajit korrik, rritja vjetore e agregatit monetar M2 arriti në 16.8%, duke shënuar një rritje të mëtejshme nga niveli i mëparshëm rekord prej 15.9% i muajit qershor. Agregati M2 është në rritje me ritme dyshifrore që prej muajit mars 2025.
Agregati monetar M2 përfshin paraja jashtë bankave dhe depozitat bankare në Lekë, të cilat konsiderohen si pjesë e parasë së gjerë. Mes komponentëve të M2, vërehet një rritje më e lartë në llogaritë rrjedhëse dhe depozitat pa afat në Lekë, të cilat u zgjeruan me 18.8% krahasuar me një vit më parë. Një rritje më e shpejtë e agregatit M2 tregon se në ekonomi po injektohen më shumë para në monedhën kombëtare.
Në fund të muajit korrik, portofoli total i kredisë për ekonominë, i shprehur si tepricë, kaloi për herë të parë vlerën e 1 trilion lekëve, duke shënuar një rritje prej 12% krahasuar me një vit më parë. Normat tërheqëse të interesit, ecuria e mirë e ekonomisë reale dhe bilancet e sektorit bankar vazhdojnë të mbështesin rritjen me ritme të shpejta të kredisë. Ecuria pozitive ka vazhduar edhe në 7-mujorin e këtij viti, pavarësisht disa masave frenuese të aplikuara nga Banka Qendrore mbi kreditë për pasuri të paluajtshme.
Ndërkohë, Banka e Shqipërisë po vazhdon ndërhyrjet në tregun valutor, me qëllim ngadalësimin e forcimit të Lekut. Forcimi i Lekut po theksohet përsëri këtë vit, pasi u ngadalësua disi gjatë vitit 2025. Aktualisht, Euro këmbehet me 91.5 lekë, në nivelin më të ulët të të gjitha kohërave. Kursi i Euros paraqitet në rënie me 5.5% krahasuar me të njëjtën periudhë të një viti më parë. Banka e Shqipërisë ka ndërhyrë rregullisht gjatë muajve të fundit, me qëllim për të zbutur këtë tendencë.
Për tremujorin e parë, blerjet arritën shifrën e 140 milionë eurove, ndërsa për tremujorin e dytë shifrat ende nuk janë bërë publike. Vitin e kaluar, sipas statistikave zyrtare, Banka Qendrore bleu shifrën rekord prej 1 miliard e 27 milionë eurove në tregun e brendshëm valutor. Sasia e valutës së blerë është rritur me 10% krahasuar me një vit më parë. Vlera e përgjithshme e blerjeve përfshin ato të planifikuara, me qëllim rritjen e rezervës valutore, por edhe ato të lidhura me ndërhyrjet direkte në treg, me qëllim për të penguar rënien e mëtejshme të kursit të këmbimit.
Rritja e ofertës së parasë është e dukshme edhe nga zgjerimi me ritme të shpejta në muajt e fundit i bilancit të Bankës së Shqipërisë. Totali i aktiveve në fund të gushtit arriti vlerën e pothuajse 915 miliardë lekëve, vlera më e lartë e regjistruar ndonjëherë. Vlera e aktiveve në bilanc u zgjerua me 3.7% krahasuar me korrikun dhe me 10.7% krahasuar me të njëjtën periudhë të një viti më parë. Në përgjithësi, zmadhimi i bilancit të Bankës Qendrore tregon një injektim më të madh të parasë në ekonomi. Vlera e parasë në qarkullim (e cila paraqitet në bilancin e Bankës së Shqipërisë si detyrim), është në rritje vjetore me 15.2%.
“`