Evropa po “digjet” nga nxehtësia: Qershori i vitit 2026, muaji më i nxehtë i regjistruar ndonjëherë në Evropën Perëndimore
Qershori i vitit 2026 shënoi muajin më të nxehtë të regjistruar ndonjëherë në Evropën Perëndimore dhe të dytin më të nxehtë në nivel kontinental dhe global, sipas të dhënave të publikuara nga observatori evropian i klimës Copernicus.
Raporti tregon se temperatura mesatare në Evropën Perëndimore arriti në 20.74°C, duke u renditur rreth 3 gradë Celsius mbi mesataren e periudhës 1991–2020. Ky rezultat theu rekordin e vendosur vetëm një vit më parë, në qershorin e vitit 2025.
Ekspertët paralajmërojnë se ndryshimet klimatike po shndërrohen gjithnjë e më shumë në një realitet të prekshëm, duke ndikuar drejtpërdrejt në jetën e përditshme.
“Ndryshimi i klimës po kalon nga një problem i së ardhmes në një realitet që po përmbys jetën e përditshme,” deklaroi Samantha Burgess, përgjegjëse për çështjet strategjike në Qendrën Evropiane për Parashikime të Motit Afatmesëm (ECMWF), e cila administron programin Copernicus. Ajo theksoi se Evropa po ngrohet dukshëm më shpejt se mesatarja globale, kryesisht për shkak të ndryshimeve në qarkullimin atmosferik.
Sipas Burgess, pritet një shtim i valëve të të nxehtit në kontinent në vitet e ardhshme. “Do të shohim më shumë valë të nxehti në një botë më të ngrohtë. Ato do të jenë më intensive, do të zgjasin më shumë dhe do të prekin zona gjithnjë e më të gjera gjeografike,” tha ajo, duke bërë thirrje për arritjen sa më të shpejtë të neutralitetit të emetimeve neto të gazeve serrë.
Raporti i Copernicus gjithashtu konfirmon vijimin e trendit të ngrohjes globale. Temperatura mesatare globale në qershor 2026 ishte 1.39°C mbi nivelet e epokës para-industriale (1850–1900), duke sjellë pasoja gjithnjë e më të dukshme në mbarë botën.