SHBA planifikon revokim masiv të vizave për azilkërkuesit, preken 20 mijë persona
Departamenti i Shtetit po shqyrton mundësinë e revokimit të vizave për deri në 200.000 shtetas të huaj, të cilët kanë kërkuar azil pasi kanë hyrë në SHBA me viza turistike ose biznesi.
Administrata e Presidentit Donald Trump po përgatitet të revokojë vizat për biznes dhe turizëm të shtetasve të huaj që kanë aplikuar ose aktualisht po kërkojnë azil në SHBA, sipas informacioneve nga Departamenti i Shtetit.
Edhe pse nuk është bërë ende e ditur shifra e saktë e vizave që do të preken, vlerësimet e agjencisë Associated Press, bazuar në dokumente të Departamentit të Shtetit dhe deklarime të dy zyrtarëve amerikanë, sugjerojnë se ky numër mund të arrijë deri në 200.000. Nëse kjo masë zbatohet, do të ishte revokimi më masiv i vizave në historinë e SHBA-së.
Çfarë thotë Departamenti i Shtetit për revokimin e vizave?
Departamenti i Shtetit pritet të njoftojë këto revokime në javët e ardhshme. Bëhet fjalë për të ashtuquajturat viza B1 dhe B2, të lëshuara gjatë periudhës 2016–2026, për persona që kanë kërkuar ose po kërkojnë aktualisht azil. Këto viza zakonisht lëshohen për udhëtime pune, turizëm, vizita familjare ose trajtim mjekësor.
“Ne po bashkëpunojmë me Departamentin e Sigurisë Kombëtare (DHS) për të identifikuar dhe revokuar vizat e shtetasve të huaj që kanë ardhur në Shtetet e Bashkuara duke deklaruar se janë vizitorë afatshkurtër, por më pas kanë paraqitur kërkesë për azil për të qëndruar këtu në mënyrë të përhershme,” tha zëdhënësi i Departamentit të Shtetit, Tommy Pigott, duke iu referuar Departamentit të Sigurisë Kombëtare. Ai nuk pranoi të jepte një numër të saktë, duke theksuar se numri “mbetet dinamik dhe mund të ndryshojë në mënyrë të vazhdueshme”.
Jo domosdoshmërisht dëbim
Zyrtarët thanë se revokimi i vizave nuk do të rezultojë domosdoshmërisht në dëbim të menjëhershëm. Sipas zyrtarëve që folën për Associated Press në kushte anonimiteti, shumica e personave me kërkesa për azil ende në shqyrtim do të rikategorizohen dhe do të humbasin statusin e tyre si udhëtarë për qëllime biznesi ose turizmi.
Zëvendëssekretari i Shtetit, Christopher Landau, kritikoi përdorimin e vizave turistike dhe të biznesit si një rrugë për paraqitjen e kërkesave për azil. “Njerëzit në SHBA dhe në të gjithë botën janë ngopur me kërkesat e rreme për azil,” shkroi ai në platformën e mediave sociale X, duke shtuar: “Azili nuk është menduar të jetë një rrugë anësore për të shmangur ligjin e imigracionit.”
Aplikantëve për vizat B1 dhe B2 aktualisht u kërkohet të deklarojnë se nuk do të kërkojnë azil dhe të dëshmojnë se kanë ndërmend të kthehen në vendet e tyre të origjinës. Mbetet e paqartë se sa nga mbajtësit aktualë të vizave kanë paraqitur realisht kërkesë për azil.