Bllokimi i anijes Touska, SHBA: Transportonte mallra që mund të përdoren në industrinë ushtarake
Anija kontejnerë me flamur iranian, e quajtur “Touska”, është sekuestruar nga forcat amerikane pranë brigjeve të Iranit. Ky veprim vjen mes dyshimeve se anija transportonte materiale me përdorim të dyfishtë, të cilat mund të shërbejnë edhe për qëllime ushtarake.
Sipas United States Central Command (CENTCOM), anija nuk iu bind paralajmërimeve të përsëritura për një periudhë gjashtëorëshe, duke shkelur kështu embargon e vendosur nga Shtetet e Bashkuara të Amerikës ndaj Iranit. Operacioni u krye pranë portit Chabahar, në Gjirin e Omanit.
“Touska” është një anije e vogël kontejnerësh, në pronësi të kompanisë Islamic Republic of Iran Shipping Lines. Ky grup është sanksionuar nga SHBA që prej vitit 2019. Dyshohet se anija transportonte artikuj të tillë si metale, tuba dhe komponentë elektronikë, materiale të cilat mund të përdoren si në industri, ashtu edhe në programe ushtarake.
Burime të sigurisë detare theksuan se anija kishte një histori të mëparshme transporti të artikujve të ngjashëm. Ajo kishte kryer një udhëtim nga Azia para se të ndalohej. Të dhënat e gjurmimit detar tregojnë se anija ishte parë më herët pranë porteve kineze dhe më pas kishte ndaluar në Malajzi për të ngarkuar kontejnerë shtesë, përpara se të mbërrinte në Gjirin e Omanit.
Autoritetet iraniane reaguan ashpër ndaj incidentit. Ministria e Jashtme e Iranit e cilësoi ndërhyrjen si “të paligjshme” dhe një shkelje të ligjit ndërkombëtar, duke kërkuar lirimin e menjëhershëm të anijes dhe ekuipazhit. Nga ana tjetër, Ushtria iraniane akuzoi SHBA-të për “pirateri të armatosur” dhe theksoi se anija po udhëtonte nga Kina.