“`html
Shehaj konfrontohet me Peleshin për Thumanë-Kashar: A komandon Balluku parlamentin?
Kreu i Partisë “Mundësia”, Agron Shehaj, në Kuvend theksoi se i është mohuar interpelanca për çështjen Thumanë-Kashar, duke shtuar se kjo temë është hequr nga kalendari pa njoftim.
Shehaj kërkoi transparencë lidhur me këtë çështje dhe nuk kurseu akuzat ndaj ish-zv/kryeministres Belinda Ballukut, si dhe drejtuesit të Kuvendit, Niko Peleshi. Ai sugjeroi se qëndrimet për këtë çështje e bëjnë të dyshojë se Parlamenti “komandohet” nga Balluku.
“1.3 miliardë euro për Thumanë-Kashar. Mund të më thuani përse më mohoni të drejtën e kësaj interpelancë? Përse e keni hequr nga programi i punës pa më njoftuar? Nëse nuk marr një përgjigje, kam të drejtë të besoj se nuk ju lë Belinda Balluku… Nuk mund ta përmend Belindën? Sot keni caktuar interpelancë me ministrin e Infrastrukturës, dhe ai nuk është. Nuk ju lë Belinda Balluku, ajo e komandon këtë Parlament? Më lë të të dyshoj,” tha Shehaj.
Nga ana e tij, Peleshi i “tregoi vijën e kuqe” dhe i bëri thirrje të respektojë rregullat.
“Ka edhe disa vija të kuqe. Kush jeni ju që shpallni kriminelin? Diskutojmë për procedurën, por ju nuk mund të përmendni asnjë. Sepse dilni jashtë kodit të rregullores, jashtë kësaj salle mund të bëni çfarë të doni. Por brenda kësaj salle jemi të dënuar të respektojmë njëri-tjetrin…,” tha ai.
“`