Sulm ajror në Gaza, vritet drejtuesi i krahut të armatosur të Hamasit
Një sulm ajror izraelit ka rezultuar në vdekjen e Izz al-Din al-Baq, kreut të krahut të armatosur të Hamasit në veri të Rripit të Gazës, sipas burimeve izraelite dhe palestineze.
Kryeministri izraelit Benjamin Netanyahu dhe ministri i Mbrojtjes Yisrael Katz, deklaruan se ushtria izraelite kishte shënjestruar al-Baq, duke e akuzuar atë për përfshirje në planifikimin e sulmeve dhe rekrutimin e militantëve.
Burime mjekësore palestineze dhe zyrtarë të Hamasit konfirmuan se al-Baq humbi jetën në një sulm ndaj një kompleksi ndërtesash në lagjen Nasr të qytetit të Gazës, në orët e para të mëngjesit. Sipas zyrtarëve shëndetësorë, në sulm u vra edhe një person tjetër.
Izraeli pretendon se Hamasi po riarmatoset dhe po kryen sulme në kundërshtim me armëpushimin e arritur në tetor. Për këtë arsye, ushtria izraelite ka intensifikuar sulmet kundër grupit gjatë javëve të fundit.
Sipas ushtrisë izraelite, të paktën 20 pjesëtarë të Hamasit janë vrarë gjatë këtij muaji, mes tyre persona që autoritetet izraelite i përshkruajnë si komandantë të lartë ose si të përfshirë në sulmet e 7 tetorit 2023 dhe marrjen e pengjeve izraelite.
Hamasi i mohon këto akuza, duke kundërshtuar gjithashtu pretendimet se po rindërton arsenalin e tij. Grupi palestinez akuzon Izraelin se po minon marrëveshjen e armëpushimit në Gaza.
Marrëveshja, e ndërmjetësuar nga Shtetet e Bashkuara, parashikon ndër të tjera rindërtimin e Gazës. Megjithatë, negociatat kanë shënuar pak përparim, pasi palët nuk kanë arritur marrëveshje mbi çështje kyçe, përfshirë çarmatimin e Hamasit dhe tërheqjen e trupave izraelite.
Pavlesharmëpushimit, sulmet ajrore izraelite në Gaza kanë vazhduar. Sipas autoriteteve shëndetësore palestineze, të paktën 1,400 palestinezë janë vrarë që nga hyrja në fuqi e armëpushimit, ndërsa ushtria izraelite thotë se ka humbur katër ushtarë gjatë së njëjtës periudhë.
Që nga nisja e operacionit ushtarak izraelit në Gaza, pas sulmit të Hamasit në jug të Izraelit në tetor 2023, autoritetet palestineze raportojnë se më shumë se 73,000 persona janë vrarë. Sulmi i Hamasit në Izrael la rreth 1,200 të vrarë.