Trump hap derën për negociata me Iranin, në tryezë lehtësimi i sanksioneve dhe lirimi i aseteve të ngrira
Presidenti amerikan Donald Trump duket se është i gatshëm të bëjë një hap drejt rifillimit të negociatave me Iranin. Ai po shqyrton mundësinë e lehtësimit të sanksioneve dhe lirimit të disa aseteve iraniane të ngrira, në këmbim të hapave konkretë nga Teherani lidhur me programin e tij bërthamor.
Sipas zyrtarëve amerikanë të cituar nga Axios, propozimi i Uashingtonit vjen në një moment kur përpjekjet diplomatike të ndërmjetësve të Katarit dhe Pakistanit për rikthimin e SHBA-së dhe Iranit në tryezën e bisedimeve kanë hasur vështirësi.
Bisedimet mes dy vendeve kanë mbetur të ngrira që prej korrikut dhe palët vazhdojnë të kenë qëndrime të ndryshme për çështjet kryesore:
- Teherani kërkon që negociatat të përqendrohen te situata në Ngushticën e Hormuzit dhe bllokada detare amerikane ndaj porteve iraniane.
- Nga ana tjetër, administrata Trump kërkon që Irani të ndërmarrë hapa dhe të bëjë lëshime lidhur me programin e tij bërthamor.
Megjithatë, oferta amerikane për lehtësimin e disa masave ekonomike dhe lirimin e aseteve të ngrira mund të krijojë hapësirë për një rikthim të diplomacisë. Kjo vjen pasi Trump kishte refuzuar propozimin e fundit të paraqitur nga pala iraniane.
Ndërkohë, ndërmjetësit pritet të takohen në Nju Jork me ministrin e Jashtëm iranian Abbas Araghchi për të diskutuar një propozim të Katarit, i cili është negociuar gjatë ditëve të fundit. Më pas pritet të zhvillohen kontakte edhe me zyrtarë të administratës Trump, me synimin për të përcjellë qëndrimin e Teheranit dhe për të gjetur një terren të përbashkët.