“`html
Sulm me dron në Detin e Zi, fundoset një anije kontejnerësh
Një incident i ri serioz ka shtuar shqetësimet për sigurinë e lundrimit në Detin e Zi, pasi anija kontejnerësh me flamur rus, YANINA, raportohet se është fundosur pas një sulmi të dyshuar nga dy mjete detare pa pilot (USV).
Sipas një alarmi sigurie të publikuar nga EOS Marine, ngjarja ka ndodhur në orët e para të 1 gushtit 2026, rreth 130 milje detare në jug të Novorossiysk. Raportimet tregojnë se dy mjete sipërfaqësore pa pilot iu afruan anijes dhe e goditën, duke shkaktuar dëme të konsiderueshme që çuan në fundosjen e saj.
Të 17 anëtarët e ekuipazhit u shpëtuan pa lëndime dhe nuk janë raportuar viktima.
Ngjarja shihet si një sinjal tjetër i përshkallëzimit të rrezikut për anijet tregtare që operojnë në zona konflikti.
EOS Marine thekson se mjetet detare pa pilot përbëjnë një kërcënim në rritje për shkak të:
- Madhmësisë së tyre të vogël.
- Profilit të ulët.
- Vështirësisë për t’u zbuluar në kohë, duke kufizuar ndjeshëm mundësinë e reagimit të ekuipazheve.
Kompania paralajmëron se ky rrezik nuk kufizohet vetëm në Detin e Zi, por mund të shfaqet edhe në rajone të tjera të ndjeshme detare, përfshirë Mesdheun Lindor dhe Lindjen e Mesme.
Për këtë arsye, rekomandohet që anijet tregtare të:
- Mbajnë monitorim të pandërprerë vizual dhe me radar.
- Analizojnë me kujdes çdo kontakt që afrohet në mënyrë të dyshimtë.
- Raportojnë menjëherë tek autoritetet detare çdo mjet pa pilot të vërejtur në det.
Kapitenët këshillohen të mos u afrohen këtyre mjeteve dhe, kur është e sigurt, të dokumentojnë pozicionin dhe karakteristikat e tyre me fotografi ose video.
Ky incident nënvizon sfidat në rritje për sigurinë detare, ndërsa përdorimi i mjeteve pa pilot po e bën gjithnjë e më të paparashikueshëm mjedisin operacional për kompanitë e transportit detar dhe ekuipazhet që lundrojnë në zonat me rrezik të lartë.
“`