“`html
Irani sekuestroi katër anije në Ngushticën e Hormuzit, ndërsa Shtetet e Bashkuara vendosën sanksione të reja.
Tensionet në Gjirin Persik janë rritur sërish pasi forcat detare iraniane ndaluan katër anije në Ngushticën e Hormuzit. Incidenti ndodhi ndërsa këto anije po përpiqeshin të hynin në rajon pa koordinim me autoritetet në Teheran.
Sipas agjencisë iraniane të lajmeve Tasnim, marina iraniane fillimisht u dërgoi paralajmërime anijeve, por ekuipazhet nuk iu bindën udhëzimeve të dhëna nga autoritetet.
Një burim ushtarak, i cituar nga media iraniane, bëri të ditur se pas mosrespektimit të urdhrave, forcat iraniane qëlluan me të shtëna paralajmëruese. Pas kësaj, anijet ndryshuan kurs dhe u tërhoqën nga zona.
Deri tani, nuk janë bërë publike detaje mbi identitetin e anijeve apo flamujt që ato mbanin.
Kjo ngjarje vjen në një moment tepër të ndjeshëm për rajonin, ndërsa SHBA dhe Irani vijojnë negociatat për një marrëveshje të mundshme që synon uljen e tensioneve mes dy vendeve.
Në të njëjtën kohë, Departamenti amerikan i Thesarit njoftoi vendosjen e sanksioneve të reja kundër Iranit. Uashingtoni shtoi në listën e zezë të “Shtetasve të Caktuar Posaçërisht” një strukturë të krijuar së fundmi nga Teherani, të quajtur Persian Gulf Strait Authority.
Ky institucion u krijua për të menaxhuar kërkesat e anijeve që kalojnë përmes Ngushticës së Hormuzit, një nga korridoret më strategjike në botë për transportin e naftës dhe gazit natyror.
“`