Tragjedi në SHBA: 16 fëmijë të gjetur të izoluar në një banesë në Ohajo, mbaheshin të mbyllur nga prindërit dhe gjyshërit
Gjashtëmbëdhjetë fëmijë u shpëtuan nga një shtëpi në gjendje të degraduar në një zonë rurale të Ohajos, pasi ishin mbajtur të izoluar në një dhomë në “kushte të mjerueshme” për pjesën më të madhe të katër viteve të fundit, njoftuan autoritetet.
Fëmijët, të cilët zyrtarët thanë se janë nga e njëjta familje dhe jetonin në mjerim, me jashtëqitje njerëzore përreth, varionin në moshë nga një vjeç e gjysmë deri në 18 vjeç dhe përfshinin djem dhe vajza.
Disa prej tyre nuk ishin në gjendje të flisnin, ndërsa një 18-vjeçare, e cila kishte aftësi të kufizuara zhvillimore, nuk dinte as të shkruante emrin e saj.
Prindërit e fëmijëve dhe dy gjyshërit u akuzuan secili me nga 16 akuza për rrezikimin e jetës së fëmijëve.
Disa fëmijë mund të dërgohen në qendra të specializuara trajtimi si pjesë e procesit të tyre të rikuperimit, thanë autoritetet e qytetit.
“Do të duhet shumë punë për të adresuar dëmin emocional dhe disa nga problemet që do të vijnë si pasojë e kësaj”, tha Prokurori i Përgjithshëm i Ohajos, Andy Wilson, gjatë një konference për shtyp, duke shtuar se nuk ka parë kurrë situatë të ngjashme me kushtet në të cilat janë përballur fëmijët.
Hetuesit po përpiqen të kuptojnë se si një situatë e tillë ka mbetur e pazbuluar për kaq gjatë. Rasti ka shkaktuar reagime të forta në opinionin publik dhe ka ngritur pikëpyetje mbi funksionimin e mekanizmave të mbrojtjes së fëmijëve në SHBA.