“`html
Tregtia me pakicë rritet me 6.7% në tremujorin e parë 2026, falë konsumit dhe karburanteve
Tregtia me pakicë në Shqipëri ka vijuar trendin e rritjes edhe në fillim të vitit 2026. Kjo rritje reflekton një kërkesë më të lartë nga konsumatorët dhe një aktivitet më të gjallë në treg, i cili mbështetet edhe nga numri në rritje i turistëve.
Sipas të dhënave të publikuara nga INSTAT, indeksi i volumit të shitjeve arriti në 115.6 në tremujorin e parë të vitit 2026, duke shënuar një rritje prej 6.7% krahasuar me të njëjtin periudhë të një viti më parë. Krahasuar edhe me tremujorin e fundit të vitit 2025, tregtia ka regjistruar zgjerim, megjithëse me ritme më të moderuara.
Zhvillimi i tregtisë me pakicë është mbështetur nga të gjitha grupet kryesore të shitjeve:
- Në tregtinë pa përfshirë hidrokarburet, volumi i shitjeve u rrit me 6.5% në baza vjetore.
- Tregtia e karburanteve shënoi një rritje edhe më të lartë, prej 7.5%.
Brenda strukturës së konsumit, ndikimin më të madh e kanë dhënë tre kategori kryesore:
- Artikujt jo-ushqimorë, me kontributin më të lartë prej +2.5 pikë përqindje.
- Hidrokarburet, me +2.3 pikë përqindje.
- Ushqimet, pijet dhe duhani, me +1.9 pikë përqindje.
Të dhënat historike tregojnë se tregtia me pakicë ka mbajtur ritme të qëndrueshme rritjeje gjatë gjithë vitit 2025, me një përshpejtim të lehtë në fillim të vitit 2026. Në tremujorin e parë të këtij viti, rritja prej 6.7% është më e larta krahasuar me tremujorët e mëparshëm të vitit të kaluar.
Sektori i hidrokarbureve, megjithëse ka shënuar ngadalësim krahasuar me ritmet dyshifrore të mëparshme, vijon të mbetet një nga kontribuuesit kryesorë në rritjen e përgjithshme të tregtisë.
Ecuria e tregtisë me pakicë konsiderohet si një tregues kyç i konsumit të brendshëm. Rritja e vazhdueshme në këtë sektor sugjeron për një kërkesë të qëndrueshme nga familjet dhe një aktivitet ekonomik që po mbështetet gjithnjë e më shumë nga konsumi, për shkak të turizmit. Megjithatë, ritmet më të moderuara krahasuar me tremujorët e mëparshëm tregojnë se zgjerimi i tregut po hyn në një fazë më të qëndrueshme, larg luhatjeve të forta, duke reflektuar një normalizim gradual të konsumit.
“`