U Deklarua Fajtor për Pastrim Parash, Trump i Jep Faljen Presidenciale Ish-drejtuesit të Binance, Changpeng Zhao
Changpeng Zhao, i njohur si “CZ”, ish-drejtuesi i bursës më të madhe të kriptomonedhave në botë, Binance, u deklarua fajtor për pastrim parash në vitin 2023 dhe dha dorëheqjen nga pozicioni i tij.
Presidenti i SHBA-së, Donald Trump, i ka dhënë faljen presidenciale Changpeng Zhao-s, themeluesit të Binance, siç konfirmoi të enjten një zyrtar i Shtëpisë së Bardhë.
Sekretarja e shtypit e Shtëpisë së Bardhë, Karoline Leavitt, deklaroi se Presidenti Trump ka “ushtruar autoritetin e tij kushtetues duke lëshuar një falje për z. Zhao, i cili u ndoq penalisht nga Administrata Biden në kuadër të luftës së tyre kundër kriptomonedhave”.
“Këto veprime të Administratës Biden kanë dëmtuar seriozisht reputacionin e Shteteve të Bashkuara si një lider global në teknologji dhe inovacion,” shtoi Leavitt. “Lufta e Administratës Biden kundër kriptovalutave ka marrë fund.”
Zhao, i njohur si CZ, u deklarua fajtor për pastrim parash dhe u largua nga posti i CEO-s së Binance në vitin 2023. Kompania ka pranuar të paguajë 4.3 miliardë dollarë për të zgjidhur akuzat e ngritura kundër saj. Ai u dënua në prill 2024 me katër muaj burg, ndërkohë që prokurorët kishin kërkuar një dënim prej tre vjetësh burg.
Komisioni i Letrave me Vlerë dhe Bursave të SHBA-së (SEC) kishte ngritur 13 akuza kundër Binance dhe Zhao, duke përfshirë përzierjen dhe devijimin e aseteve të klientëve drejt një entiteti të quajtur Sigma Chain, i cili zotërohej nga Zhao.
Ky zhvillim pati pasoja edhe për tregun, duke shkaktuar një humbje prej pothuajse 2% të vlerës së Bitcoin brenda pak minutash.
Sipas Axios, Binance kishte zhvilluar aktivitete lobuese me Presidentin Trump për më shumë se një vit, dhe kjo falje mund të sinjalizojë mundësinë që Binance të operojë sërish në Shtetet e Bashkuara.