Trump: Jam i hapur për kontakt të drejtpërdrejtë me lidershipin e Iranit
Presidenti i SHBA-së, Donald Trump, ka deklaruar se është i hapur për kontakt të drejtpërdrejtë diplomatik me udhëheqjen e Iranit. Ai shprehu këtë qëndrim në një intervistë dhënë për “New York Post”.
“Nuk kam problem t’i takoj,” u shpreh Trump. “Nëse ata duan të takohen, dhe ne kemi njerëz shumë të aftë, unë nuk kam problem t’i takoj.”
Trump theksoi se kushti kryesor i negociatave, një kërkesë që nuk mund të diskutohet, është që Irani të heqë dorë nga çdo përpjekje për të prodhuar armë bërthamore.
“Hiqni dorë nga armët e tyre bërthamore. Kjo është shumë e thjeshtë,” tha ai. “Nuk do të ketë armë bërthamore.”
Presidenti Trump refuzoi të jepte detaje mbi pasojat që mund të përballet Teherani në rast refuzimi ose dështimi të negociatave, veçanërisht duke marrë parasysh afatin e afërt të armëpushimit.
“Epo, nuk dua të flas për këtë me ju,” u përgjigj ai kur u pyet nëse SHBA-të do të ndërmerrnin masa më të ashpra, si sekuestrimi i më shumë anijeve të lidhura me Iranin. “Mund ta imagjinoni. Nuk do të ishte e këndshme.”
Lidhur me pyetjen nëse SHBA-të e dinë kush e udhëheq Iranin, Trump tha: “Ne kemi ide mjaft të mira dhe mendojmë se po merremi me njerëzit e duhur.”