Trump: S’ka ndihma ushqimore derisa të rihapet qeveria federale
Presidenti i SHBA-së, Donald Trump, ka deklaruar se ndihmat ushqimore për miliona amerikanë të varfër, të ofruara përmes programit SNAP të Departamentit të Bujqësisë, nuk do të jepen nëse demokratët nuk i japin fund mbylljes së qeverisë federale.
“Përfitimet do të ofrohen vetëm kur demokratët do të rihapin qeverinë, gjë që ata mund ta bëjnë lehtësisht, dhe jo para kësaj”, shkroi ai në platformën Truth Social.
Mediat e huaja raportojnë se qeveria pretendon se nuk ka fonde të mjaftueshme për të mbuluar programin SNAP për shkak të mbylljes aktuale.
Kjo mbyllje 35-ditore e qeverisë ka shkaktuar mosmarrëveshje mes demokratëve dhe republikanëve, duke bllokuar përpjekjet për të arritur një marrëveshje për buxhetin.
Një gjyqtar federal në Rhode Island urdhëroi administratën Trump që të vazhdojë pagesat e përfitimeve të SNAP të hënën, ose të bëjë pagesa të pjesshme deri të mërkurën. Arsyeja ishte se përfituesit do të dëmtoheshin në mënyrë të pariparueshme nëse nuk merrnin ndihmën në kohë.
Si përgjigje në një padi gjyqësore, qeveria njoftoi se do të ndante 450 milionë dollarë të ardhura nga taksat për një program tjetër dhe për ndihmat ushqimore për fëmijët e vegjël, por nuk do të siguronte 4 miliardë dollarët e nevojshëm për të financuar plotësisht programin SNAP.