Trump optimist për një marrëveshje: Irani nuk do ketë armë bërthamore për 20 vjet
Presidenti i Shteteve të Bashkuara, Donald Trump, është shprehur optimist për perspektivën e një zgjidhjeje diplomatike të konfliktit me Iranin. Ai ka deklaruar se Irani ka rënë dakord të mos pajiset me armë bërthamore dhe se marrëveshja në negociim parashikon zgjatjen e saj për 20 vjet.
Trump ka theksuar se perspektivat për një marrëveshje “duken shumë pozitive”, duke shtuar se takimi i ardhshëm me delegacionin iranian mund të zhvillohet gjatë fundjavës.
Presidenti amerikan ka kritikuar sërish Papa Françesku për deklaratat e tij kundër luftës. Ai ka pretenduar se Irani është përgjegjës për vdekjen e 42,000 njerëzve dhe ka theksuar se Teherani “nuk duhet të pajiset me armë bërthamore”. Me një ton të pazakontë, ai vuri në dukje se “edhe Papa duhet ta kuptojë këtë”, duke sqaruar se nuk ka ndërmend të takohet me të.
Duke iu referuar zhvillimeve në Gjirin Persik, ai e ka përshkruar planin për bllokimin e Ngushticës së Hormuzit si “të shkëlqyer” dhe ka thënë se deri tani po shkon shumë mirë, ndërsa është shfaqur gjithashtu optimist për gjetjen e një zgjidhjeje diplomatike.
“Tregjet po ecin mirë, çmimet e naftës po ecin mirë, besoj se do të bëjmë një marrëveshje të mirë me Teheranin pa armë bërthamore”, ka theksuar ai.
Trump ka përmendur gjithashtu se takimi i ardhshëm për Iranin mund të zhvillohet këtë fundjavë dhe se mund të mos ketë nevojë të zgjasë armëpushimin me Iranin, i cili skadon javën tjetër (më 21 prill).
“Po shkojmë shumë mirë, mund t’ju them këtë”, u tha Trump gazetarëve në Shtëpinë e Bardhë. “Nuk jam i sigurt nëse duhet të zgjatet”. Ai shtoi se Irani ishte i gatshëm të bënte një marrëveshje dhe kishte treguar se ishte “i gatshëm të bënte gjëra sot që nuk ishte i gatshëm t’i bënte dy muaj më parë”.
Kur u pyet se çfarë do të ndodhte nëse SHBA-të dhe Irani nuk do të arrinin një marrëveshje të përhershme, Trump u zotua të shtonte përsëri sulmet. “Nëse nuk ka marrëveshje, luftimet do të rifillojnë”, tha ai.
Ai përmendi gjithashtu Hezbollahun, duke vlerësuar se organizata “do të vazhdojë armëpushimin”, të cilin e përshkroi si një zhvillim të rëndësishëm për stabilitetin në rajon. Trump tha se armëpushimi i rënë dakord midis Libanit dhe Izraelit përfshin edhe Hezbollahun dhe u shfaq optimist se lëvizja islamiste pro-iraniane do t’i përmbahej atij.
Pak më herët, organizata kishte deklaruar se do t’i përmbahej armëpushimit, i cili do të hyjë në fuqi sonte në mesnatë, me kusht që Izraeli të ndërpresë plotësisht armiqësitë.
Trump tha gjithashtu se udhëheqësit e Libanit dhe Izraelit mund të takohen në Shtëpinë e Bardhë pas një ose dy javësh. “Do të shohim nëse mund të bëjmë paqe”, tha ai, duke lënë të hapur mundësinë që ai vetë të vizitojë Libanin “në kohën e duhur”.