Takimi Putin-Witkoff, Kievi nis një delegacion të ri bisedimesh në SHBA
Presidenti ukrainas, Volodymyr Zelensky, ka njoftuar një raund të ri bisedimesh në SHBA me qëllim dhënien fund të luftës në Ukrainë. Ky njoftim vjen një ditë pas takimit në Kremlin mes Vladimir Putinit dhe të dërguarve të Donald Trump, Steve Witkoff dhe Jared Kushner, i cili përfundoi pa rezultate konkrete.
Pas kthimit të delegacionit amerikan nga Moska dhe konsultimeve të tyre në Uashington, Zelensky ka deklaruar se Rustem Umerov, Andriy Hnativ dhe personat e tjerë të nevojshëm për negociatat do të vazhdojnë dialogun me përfaqësuesit e Trumpit.
Ky raund i ri i kontakteve zhvillohet pas takimit pesëorësh në Kremlin mes Putinit dhe të dërguarve amerikanë, takim i cili nuk arriti të sillte një marrëveshje për t’i dhënë fund luftës.
Ditën e sotme, Kremlini ka deklaruar se Putin ka pranuar disa nga propozimet amerikane për zgjidhjen e konfliktit, ndërsa disa të tjera janë hedhur poshtë. Rusia është e gatshme të takohet me negociatorët amerikanë “sa herë të jetë e nevojshme” për të arritur një marrëveshje.
Pyetja kryesore që shtrohet tani është se çfarë do të ndodhë më tej, pasi Putin duket se nuk është i gatshëm të bëjë lëshime territoriale. Kjo çështje është më e madhja shqetësim për Kievin, veçanërisht duke pasur parasysh frikën se Trump, i lodhur nga mungesa e progresit, mund të tërhiqet nga roli i ndërmjetësuesit.
Edhe pse Putin nuk ka arsye për t’u tërhequr dhe dëshiron që kundërshtarët e tij të besojnë se asgjë nuk mund ta detyrojë atë të ndryshojë kursin, kjo situatë mund të ndryshojë në të ardhmen. Kjo mund të ndodhë për shkak të presionit nga liderët evropianë, qeveria e Trumpit, apo vetë Zelenskyt. Kjo sidomos nëse rriten presionet ekonomike ndaj Rusisë, pasi të ardhurat nga nafta dhe gazi janë në rënie, ndërsa deficiti buxhetor po zgjerohet.
Edhe vetë Putini ka pranuar ekzistencën e problemeve, duke folur për “pabarazi” në ekonomi. Ai ka deklaruar këtë javë: “Në disa sektorë, prodhimi jo vetëm që nuk është rritur këtë vit, por në fakt është ulur. A jemi të kënaqur me këto prirje? Jo.”