Tmerr në Meksikë: Zbulim i varrit masiv me mbi 1 mijë eshtra
Një zbulim tronditës është bërë publik në Mexico City, ku pranë liqenit Xochimilco janë gjetur mbi 1,000 fragmente kockash njerëzore. Ky zbulim është bërë nga një grup vullnetarësh dhe familjarësh të personave të zhdukur.
Ngjarja është përshkruar si një “realitet katastrofik” nga familjet që kërkojnë të gjejnë të afërmit e tyre. Ato theksojnë se vendi po përballet me një krizë mjeko-ligjore me përmasa të jashtëzakonshme. Familjarët akuzojnë autoritetet se po përpiqen ta minimizojnë situatën dhe kërkojnë vëmendje ndërkombëtare.
Autoritetet lokale kanë filluar procesin e zhvarrosjes së zonës javën e kaluar. Prokuroria ka konfirmuar deri tani gjetjen e rreth 300 fragmenteve kockore. Megjithatë, grupet e vullnetarëve insistojnë se numri i mbetjeve njerëzore tejkalon 1,000. Ata theksojnë se disa fragmente janë gjetur edhe në zona që më parë kanë qenë nën kontrollin e institucioneve shtetërore.
Ky zhvillim përkeqëson një krizë të thellë që ka përfshirë Meksikën për më shumë se një dekadë. Që nga viti 2006, kur qeveria filloi një ofensivë kundër karteleve të drogës, mbi 480,000 persona kanë humbur jetën dhe rreth 130,000 të tjerë rezultojnë të zhdukur.
Një panel ekspertësh i Kombeve të Bashkuara e ka cilësuar krizën e zhdukjeve si një “krim kundër njerëzimit”, duke akuzuar autoritetet për mosveprim dhe mangësi serioze në hetimet e tyre. Kreu i panelit, Juan Alban-Alencastro, ka vënë në dukje se shqetësimet kryesore mbeten “shkalla e fenomenit, modeli i sulmeve dhe synimi ndaj civilëve”.