Ndërmjetës në një rrjet prostitucioni, arrestohet vëllai i Nusretit
Ozgur Gökçe, vëllai i kuzhinierit të famshëm Nusret, është arrestuar nga autoritetet turke. Ai dyshohet të jetë përfshirë në veprimtarinë e “ndërmjetësimit në prostitucion të një të miture”. Arrestimi bëhet pjesë e një hetimi të gjerë të Prokurorisë së Küçükçekmece.
Hetimi, i drejtuar nga Zyra e Prokurorit të Küçükçekmece dhe njësitë e krimit të organizuar, dyshon se të përfshirët kanë organizuar dhe lehtësuar prostitucionin duke marrë me qira banesa dhe dhoma hoteli. Gjithashtu, komunikimet janë zhvilluar përmes aplikacioneve mobile.
Sipas autoriteteve, gjatë hetimeve janë zbuluar edhe dyshime për pastrim parash. Kjo veprimtari dyshohet të jetë kryer duke përdorur llogari bankare të personave të ndryshëm, në këmbim të komisioneve të fituara nga aktiviteti i paligjshëm.
Raportohet se të dyshuarit kanë qarkulluar rreth 15 milionë lira turke gjatë një viti, të cilat dyshohet se lidhen me këto aktivitete.
Operacioni policor është zhvilluar më 17 prill në disa qytete të Turqisë, përfshirë Stambollin, Ankaranë, Samsunin dhe Diyarbakirin. Janë ushtruar kontrolle në 14 adresa të ndryshme, ku janë arrestuar në total 13 persona. Nga këta, 7 janë lënë në paraburgim dhe 6 janë liruar me masa sigurie.
Mes të ndaluarve ndodhet edhe Ozgur Gökçe, i cili mbetet në paraburgim ndërsa hetimet vazhdojnë.