“`html
Yield-et e bonove 12-mujore arrijnë nivelin më të lartë në 14 muaj
Yield-et e bonove 12-mujore u rritën sërish në ankandin e muajit shkurt, duke arritur nivelin më të lartë në më shumë se një vit. Sipas të dhënave nga Banka e Shqipërisë, yield-i mesatar i ponderuar shënoi 2.75%, niveli më i lartë që prej qershorit të vitit të kaluar.
Pjesëmarrja e investitorëve në ankand rezultoi sërish e ulët. Nga 7.2 miliardë lekë, shuma e shpallur për financim nga Ministria e Financave, vlera totale e kërkesave ishte rreth 6.86 miliardë lekë. Ky ishte ankandi i tretë radhazi ku shuma e shpallur për t’u financuar nuk u arrit të plotësohej.
Rritja e yield-eve, që nisi në tremujorin e dytë të këtij viti, mund të shpjegohet fillimisht me rritjen e inflacionit gjatë muajve të fundit. Në muajin korrik, inflacioni arriti në 3.4%, duke u ngjitur më tej mbi objektivin prej 3% të Bankës së Shqipërisë. Shtrenjtimi i karburanteve, si pasojë e krizës gjeopolitike në Lindjen e Mesme, si dhe presionet inflacioniste të brendshme, veçanërisht nga çmimet e qirave, kanë sjellë një valë të re rritjeje të inflacionit.
Banka e Shqipërisë mbetet e bindur se kjo rritje e inflacionit do të jetë afatshkurtër. Këshilli Mbikëqyrës vendosi ta mbajë normën bazë të pandryshuar edhe në mbledhjen e gushtit. Megjithatë, tregu financiar ka nisur të reagojë me një korrigjim në rritje të yield-eve, çka mund të shpjegohet kryesisht me pritshmëritë për norma më të larta interesi.
Pjesërisht, rritja e yield-eve gjatë tremujorit të tretë lidhet edhe me një pjesëmarrje më të ulët të sektorit bankar në ankandet e titujve qeveritarë, si dhe me rritjen e kërkesës për financim nga qeveria në tregun e brendshëm, krahasuar me tremujorët paraardhës. Sipas kalendarit të emetimeve të Ministrisë së Financave, shuma e planifikuar për huamarrje në ankandet e bonove dhe obligacioneve parashikohet të jetë 79.5 miliardë lekë, një rritje prej 18% krahasuar me të njëjtën periudhë të vitit të kaluar.
Fakti është se yield-et e bonove 12-mujore tashmë janë 0.25 pikë përqindje mbi nivelin e normës bazë, ndërkohë që deri në muajin prill ishin ende nën normën bazë të interesit. Rritja e yield-eve të bonove 12-mujore përcillet edhe me kosto më të lartë huamarrjeje për sektorin privat. Duke qenë se bonot 12-mujore janë instrumenti kryesor benchmark për bonedhën vendase, normat e interesit të kredive afatgjata ndërtohen duke u mbështetur te ecuria e tyre, plus një marzh fiks interesi. Rritja e yield-eve të bonove 12-mujore, rrjedhimisht, përkthehet edhe në rritje të interesave të kredive.
Pavarësisht optimizmit të Bankës së Shqipërisë, duket se tregu financiar projeksionon një rritje të afërt të normave të interesit.
Burimi: BSH
“`