“`html
Deklarata e Merz për “pamjen e qyteteve” shkakton debat publik
Auron Dodi: Sondazhi tregoi se 63% e popullsisë e mbështet
E djathta ekstreme ka fituar terren në të gjithë Evropën vitet e fundit. Partia populiste e krahut të djathtë Reform UK dhe Alternativa për Gjermaninë (AfD) kryesojnë rregullisht në sondazhet e opinionit. Kjo ndodh pavarësisht përpjekjeve të udhëheqësve politikë të partive kryesore të qendrës për të fituar votues duke imponuar masa gjithnjë e më të ashpra për migrimin dhe duke përdorur më shumë retorikë kundër migrantëve.
Në Gjermani këtë javë, përdorimi i kësaj retorike ka qenë objekt debati publik dhe zemërimi në shumë qarqe, pas vërejtjeve të Kancelarit Friedrich Merz në lidhje me “pamjen e qyteteve” të Gjermanisë dhe ndikimin e supozuar të emigrantëve në të. Kur një gazetar i kërkoi të sqaronte vërejtjet e tij disa ditë më vonë, ai i përforcoi ato, duke thënë: “Pyesni vajzat tuaja se çfarë mund të kisha dashur të thoja”.
News24: Një deklaratë dhe reagimet që pasojnë nuk ndalen. Pse me kaq pasion, edhe pas sqarimeve që dha Kancelari Merz?
A. Dodi: Siç e përmenda, kritikat u shkaktuan nga ajo që u ndje si aluzion se grupe të caktuara të popullsisë e ndikojnë negativisht pamjen e qyteteve. Një sociologe, Nina Perkowski, shpjegoi në rrjetin televiziv ARD se termi “pamje e qyteteve” perceptohet si eufemizëm për praninë e dukshme të njerëzve që nuk i shohin si “gjermanë”. Sociologë të tjerë theksuan se ka njerëz me origjinë emigrantësh që ndihen të huaj në vendin e tyre, në Gjermani. Por nga 83.5 milionë banorët e Gjermanisë, 21.2 milionë kanë origjinë migrimi – domethënë, ata ose prindërit e tyre kanë marrë shtetësinë gjermane dikur në të kaluarën. Kurse 14.1 milionë vetë në Gjermani janë (plotësisht) shtetas të huaj.
Fakt është se për shkak të zhvillimit demografik në Gjermani, imigrimi do të jetë i nevojshëm edhe në të ardhmen. Njëkohësisht është e pamohueshme se imigrimi krijon edhe fërkime. Dhe politikanëve u duhet të merren me këtë.
News24: A ka në fakt një bazë objektive ajo që tha Kancelari Merz?
A. Dodi: Po, siç u dëshmua edhe nga një sondazh i televizionit publik ZDF. Sondazhi tregoi se 63% e popullsisë e mbështet deklaratën e Merz-it, pra mendon njësoj si ai. Kjo nuk të çudit, kur deklarata prek një fakt, se ambjente të caktuara në disa qytete gjermane, p.sh. stacionet e mëdha të trenave, sheshe të caktuara, kanë probleme me sigurinë. Por se nga vjen pasiguria, për këtë në Gjermani ka mendime të ndryshme, siç treguan edhe protestat publike. Edhe revista e televizionit publik, Tageschau24, konkludoi se në realitet ekzistojnë dy çështje: çështja e sigurisë dhe perceptimi i njerëzve me origjinë migranti.
Politikanë të njohur, si politikani i Gjelbër Cem Özdemir, thanë se problemi qëndron më pak në përmbajtjen e deklaratës, sesa në formën se si u shpreh. Sipas Özdemirit, Merzi duhet të kishte folur më shumë për “zgjidhjen e problemit të migrimit të parregullt”. Özdemiri bëri thirrje për një debat mbi sigurinë. Politikani i Gjelbër pranoi se frika nga krimi, veçanërisht në transportin publik, p.sh. natën, është reale te shumë njerëz, veçanërisht femra. Ai kërkoi që politika të merret me këtë. “Nëse nuk e bëjmë, tha Özdemiri, kjo është e barabartë me një thirrje për të votuar për AfD-në.”
News24: Po për politikanët kryesorë gjermanë, a ishte temë deklarata e Merzit?
A. Dodi: Po, deklaratat e Kancelarit Merz për pamjen e qyteteve u debatuan edhe në parlament, në Bundestagun Gjerman. Nga Të Gjelbrit në opozitë, Katharina Dröge, i kritikoi deklaratat si “të dëmshme, diskriminuese dhe të papërshtatshme”. Jo vetëm opozita, as partnerët e koalicionit qeveritar, socialdemokratët, nuk e mbështetën deklaratën. Zëvendëskancelari socialdemokrat, Lars Klingbeil, theksoi se pamja fizike nuk duhet të përcaktojë a përshtatet dikush me pamjen e qyteteve.
Por Jens Spahn, që kryeson Grupin Parlamentar të CDU-së, partia e Merzit, argumentoi se pasojat e migrimit të parregullt janë të dukshme dhe të pamohueshme. Sidomos në stacionet e trenave, shtoi ai në një intervistë me gazetën BILD, vërehen “degradim, trafikantë droge, të rinj, kryesisht me origjinë emigrante, kryesisht nga Europa Lindore ose nga hapësira kulturore arabo-myslimane”.
Temën e preku, ndonëse jo drejtpërdrejt, edhe ish-kancelarja Angela Merkel. Ajo lexoi për këtë në Bonn citate nga libri i kujtimeve të saj. Veçanërisht për politikën ndaj refugjatëve, tha ajo, duhet “vepruar me ndershmëri përsa i përket temës dhe me moderim në ton”.
Gjithsesi, reagimet në Gjermani tregojnë se çështja e migrimit mbetet polarizuese. Partia e Kancelarit, CDU, bën çdo përpjekje për të mos ia lënë temën e migrimit partisë pjesërisht të ekstremit të djathtë AfD-së, e cila kërkon “remigrim”, kthim të të huajve “jo gjermanë sa duhet” në atdhe, pra kërkon një Gjermani tjetër. E gjitha ndodh në një kohë kur rigjallërimi i ekonomisë gjermane meriton shumë vëmendje.
“`