Britani: 15-vjeçari që u bullizua në shkollë, gjendet i vdekur në fermën e familjes
Një 15-vjeçar në Britani, i cili ishte viktimë e bullizmit nga shokët e tij të shkollës, ka ndërruar jetë. Jack Allott u gjet i vdekur nga prindërit e tij në fermën e familjes në Barnsley, në janar, pas javësh të tëra ngacmimesh psikologjike nga një grup nxënësish në gjimnaz.
Sipas Daily Mail, hetimi zyrtar mbi ngjarjen ka përfunduar me konkluzionin se adoleshenti i dha fund jetës së tij pasi nuk mundi të përballonte ngacmimet e vazhdueshme.
Para se të ndërmerrte këtë hap tragjik, 15-vjeçari i kishte thënë nënës së tij, Sarah Richardson, se po “e bezdisnin” disa prej “miqve të tij të supozuar” në shkollë. Në gjykatën e Sheffield-it, ajo dëshmoi se Jack ishte bërë shënjestër “sepse ishte shumë i mirë”.
Nëna e tij shtoi se kishte gjetur një letër lamtumire nga djali, nga e cila kuptoi menjëherë çfarë kishte ndodhur. Familja e tyre zotëron një fermë, dhe pikërisht aty Jack i dha fund jetës. Ai u dërgua në spital, ku mjekët konstatuan vdekjen e tij.
“Ishte një djalë kaq i lumtur, i mirë, i dashur dhe bujar. Ai ishte shumë i mirë – dhe pikërisht për këtë arsye u bë shënjestër,” tha Sarah për autoritetet, sipas YorkshireLive. “Ai ishte i bukur, i ndjeshëm, i dashur dhe adhuronte kafshët e tij. Ai ishte numri im një,” shtoi ajo me dhimbje.
Varrimi i Jack-ut u mbajt më 28 shkurt, ku u nderua nga një paradë me gati 100 traktorë, që “paralizoi Barnsley-n” në shenjë respekti për të.
Grupi “Tractor Lads Around Penistone” po mbledh fonde për “Bee Kind for Honey”, një organizatë bamirësie që punon për parandalimin e vetëvrasjeve tek të rinjtë në Barnsley. Ata do të organizojnë një paradë festive me traktorë në nëntor për këtë qëllim.
“Nëse arrijmë të parandalojmë qoftë edhe një familje që të mos përjetojë atë që përjetoi familja e Jack-ut, do ta kemi arritur qëllimin tonë,” tha Andy Lucas, anëtar i grupit Tractor Lads Around Penistone.