Sulmet ruse godasin Kievin përgjatë natës, një viktimë dhe dhjetëra të plagosur
Të paktën një person humbi jetën pasi Rusia nisi një sulm masiv dhe të kombinuar ndaj Kievit herët të premten. Sulmi shkaktoi zjarre dhe dëmtimi të ndërtesave banimi në shumë lagje të kryeqytetit, sipas kryebashkiakut Vitali Klitschko.
Të paktën 26 persona u plagosën, ndërsa ekipet e emergjencës iu përgjigjën sulmeve të shumta, raportuan zyrtarë. Nëntë persona u shtruan në spital, përfshirë një grua shtatzënë, pas një serie shpërthimesh të fuqishme që u dëgjuan në qytet dhe aktivizimit të mbrojtjes ajrore. Midis të lënduarve ishin dy fëmijë, 7 dhe 10 vjeç.
Klitschko tha se dy persona të tjerë mund të kenë vdekur në sulm, por ky informacion nuk mund të konfirmohet ende pasi punëtorët e shpëtimit nuk ishin në gjendje të nxirrnin trupat nga rrënojat.
Të paktën 11 ndërtesa banimi shumëkatëshe në disa lagje u goditën gjatë sulmit, sipas Klitschkos. Në distriktet Shevchenkivskyi dhe Holosiivskyi, mbeturinat që binin nga objektet e goditura shkaktuan një zjarr në një zonë të hapur pranë një qendre mjekësore dhe brenda një ndërtese jo-rezidenciale.
Zyrtarët u bënë thirrje banorëve të qëndrojnë në strehimore derisa të hiqet alarmi për sulme ajrore. Autoritetet e qytetit paralajmëruan se ndërprerjet e energjisë elektrike dhe të ujit janë të mundshme.
Në rajonin përreth, sulmet ruse dëmtuan infrastrukturën kritike dhe shtëpi private, duke plagosur të paktën gjashtë persona, tha kreu rajonal Mykola Kalashnyk. Një burrë 55-vjeçar në Bila Tserkva pësoi djegie termike dhe u shtrua në spital, shtoi ai.
Sulme u raportuan edhe në pjesë të tjera të Ukrainës, sipas Forcave Ajrore të Ukrainës.
Sulmet vijnë ndërsa Rusia po arrin përparime në Ukrainën jugore. Forcat ukrainase janë tërhequr nga disa fshatra në Zaporizhzhia mes luftimeve të ashpra kundër forcave ruse. Gjatë katër javëve të fundit, Ministria Ruse e Mbrojtjes ka raportuar se ka pushtuar nëntë vendbanime dhe fshatra në Donetsk, tetë në rajonin e Zaporizhzhisë, shtatë në rajonin e Dnipropetrovskut dhe pesë në rajonin e Kharkivit.
Lufta e Rusisë, e karakterizuar si një luftë gërryese, ka rezultuar e kushtueshme për sa i përket viktimave dhe armatimit. Ukraina ka arritur ta mbajë nën kontroll përparimin gradual rus në fushën e betejës.
Instituti për Studimin e Luftës tha se rrethimi i Pokrovskut nga Rusia, ku ka vendosur operatorë elitë të dronëve dhe ushtarë të forcave speciale “spetsnaz”, ka qenë i ngadaltë për shkak se komandantët e saj ushtarakë po i shpërndajnë gjerësisht burimet e tyre.
Ndërkohë, Ukraina ka nisur sulme të vazhdueshme me dronë me rreze të gjatë veprimi ndaj aseteve ushtarake me vlerë të lartë brenda Rusisë.