Lituania nuk do të dorëzohet përballë kërcënimeve: Përgatitjet për një sulm të mundshëm rus, kryeministri njofton planet e evakuimit
Kryeministri i Lituanisë, Mindaugas Sinkevičius, ka bërë të ditur se vendi ka zhvilluar plane evakuimi në rast të një sulmi të mundshëm nga Rusia, duke theksuar se autoritetet po përgatiten për skenarë të ndryshëm përshkallëzimi.
Në një intervistë për BBC, Sinkevičius shprehu shqetësimin e qytetarëve lituanezë përballë Rusisë, veçanërisht pas incidenteve të regjistruara me dronë që kanë depërtuar në hapësirën ajrore të vendit. Ai sqaroi se autoritetet po hartojnë plane që përfshijnë edhe evakuimin e personave të moshuar nga qytetet, si dhe masa për të parandaluar bllokimet e trafikut në rast emergjence.
“Po shqyrtojmë një sërë skenarësh. Jo të gjithë diskutohen publikisht. Ne përballemi me kërcënime konkrete. Jo çdo ditë, por po i përjetojmë dhe ky është një realitet për ne”, deklaroi kryeministri lituanez.
Sinkevičius i bëri thirrje Britanisë së Madhe për një angazhim më të fortë në çështjet e mbrojtjes, duke nënvizuar pozicionin gjeografik të Lituanisë dhe afërsinë e saj me Rusinë.
Lituania është anëtare e NATO-s që nga viti 2004 dhe kufizohet me enklavën ruse të Kaliningradit. Sipas nenit 5 të Traktatit të NATO-s, një sulm i armatosur kundër një shteti anëtar konsiderohet sulm kundër të gjithë aleancës.
Vendet baltike kanë forcuar masat e sigurisë që nga fillimi i pushtimit të plotë rus të Ukrainës në vitin 2022. Gjatë kësaj periudhe, janë raportuar gjithashtu një numër incidentesh me dronë në hapësirën ajrore të vendeve të rajonit.
Kryeministri lituanez theksoi se vendi i tij nuk ka ndërmend të dorëzohet përballë kërcënimeve dhe se, në rast sulmi, do të kundërpërgjigjet.