Cristiano Ronaldo do të takohet me Presidentin Trump në Shtëpinë e Bardhë
Presidenti i Shteteve të Bashkuara, Donald Trump, do të presë sot yllin portugez të futbollit Cristiano Ronaldo në Shtëpinë e Bardhë. Ky takim vjen vetëm pak muaj para fillimit të Kupës së Botës, e cila këtë verë do të zhvillohet në SHBA, Meksikë dhe Kanada.
Vizita zhvillohet në një kohë kur raportohet se Portugalia ka planifikuar një ndeshje miqësore me ekipin kombëtar amerikan gjatë fazës së ndeshjeve të marsit. Sipas rrjetit amerikan “MS NOW”, Ronaldo pritet të mbërrijë në Shtëpinë e Bardhë në të njëjtën ditë kur Presidenti Trump do të zhvillojë një takim edhe me Princin e Kurorës së Arabisë Saudite, Mohammed bin Salman.
Megjithëse nuk është ende e qartë nëse dy takimet janë të lidhura mes tyre, lidhja e Ronaldos me klubin saudit Al Nassr ka ngritur pikëpyetje. Presidenti Trump, duke iu referuar vizitës së Princit bin Salman, deklaroi të premten: “Është më shumë sesa një takim. Ne nderojmë Arabinë Saudite dhe princin e saj të kurorës.”
Dëshira e Ronaldos për të takuar Presidentin amerikan u bë e ditur gjatë një interviste me gazetarin britanik Piers Morgan, një mik i vjetër i Trump që prej kohës kur Morgan fitoi edicionin e vitit 2008 të programit “Celebrity Apprentice”. Gjatë intervistës, Morgan përmendi një fanellë të nënshkruar nga Ronaldo, të cilën ia kishte dhuruar Trumpit, me mbishkrimin: “Presidenti Donald J. Trump luan për paqen.”
I pyetur në lidhje me këtë, Ronaldo u shpreh: “Nëse bota është në paqe, ky është qëllimi ynë. Ai është një nga njerëzit që mund ta ndryshojë ose të ndihmojë në ndryshimin e botës. Dhe ky është qëllimi im kryesor: të takohem me Trumpin dhe të flasim për paqen botërore. Nëse mund ta bëni të ndodhë, ai është dikush me të cilin do të doja shumë të ulesha.”
Vizita e sotme pritet të tërheqë vëmendje të madhe mediatike, duke pasur parasysh rolin ndërkombëtar të të dy figurave dhe ndikimin global të Kupës së Botës që po afrohet.