“`html
Trump kundër “frenave” të inteligjencës artificiale: Robotët nuk do ta pushtojnë botën, i vetmi kontroll i nevojshëm është një president i zgjuar
Presidenti amerikan Donald Trump ka shprehur kundërshtimin e tij ndaj thirrjeve për rregullim më të rreptë të inteligjencës artificiale (IA), duke argumentuar se Shtetet e Bashkuara duhet të ruajnë avantazhin teknologjik ndaj Kinës.
Në një seri postimesh dhe deklaratash publike, Trump ka minimizuar shqetësimet rreth rreziqeve të IA-së, duke theksuar se mbikëqyrja e tij është e mjaftueshme për të parandaluar zhvillime të rrezikshme. Ai e ka cilësuar debatin mbi rreziqet e IA-së si një “mashtrim”, duke e krahasuar me shqetësimet rreth ndryshimeve klimatike dhe hetimet mbi lidhjet e fushatës së tij me Rusinë.
Trump ka mbrojtur gjithashtu ndërtimin e qendrave të të dhënave, pavarësisht kundërshtimeve në disa komunitete për zgjerimin e shpejtë të infrastrukturës së nevojshme për zhvillimin e IA-së.
“E vetmja kontroll ose ‘valvul sigurie’ që i duhet IA-së është një president i fortë dhe inteligjent”, ka shkruar Trump në platformën e tij Truth Social, duke shtuar se Shtetet e Bashkuara tashmë kanë pushtet të konsiderueshëm rregullator mbi kompanitë e teknologjisë.
Gjashtë postime në një ditë
Qëndrimi i presidentit amerikan u bë veçanërisht i dukshëm të hënën, kur ai publikoi gjashtë postime lidhur me inteligjencën artificiale. Trump zhvilloi gjithashtu një bisedë telefonike me Jensen Huang, drejtuesin ekzekutiv të Nvidia-s, ndërsa ky i fundit ndodhej në një konferencë në Los Angeles. Gjatë bisedës, Trump u shpreh se nuk beson se inteligjenca artificiale apo robotët do të marrin kontrollin e botës.
“Robotët nuk do të pushtojnë. IA nuk do të pushtojë pjesën tjetër të botës. E gjithë kjo është një mashtrim”, tha ai.
Trump ka deklaruar më herët se përdor vetë inteligjencën artificiale, ndërsa sipas këshilltarëve të tij, përdorimi i tij është kryesisht i lidhur me krijimin e imazheve për postimet në rrjetet sociale.
Vance: Ka rreziqe, por rregullimi mund të favorizojë gjigantët
Edhe zëvendëspresidenti J.D. Vance ka shprehur rezerva ndaj kërkesave të disa drejtuesve të industrisë për rregulla më të forta. Ai paralajmëroi se një paketë e re rregullash mund të shndërrohet në një “Kali të Trojës”, duke favorizuar kompanitë më të mëdha që kanë burimet për të përballuar kostot e rregullimeve.
Megjithatë, Vance pranoi se inteligjenca artificiale sjell edhe rreziqe dhe pasoja negative dhe tha se Shtëpia e Bardhë dhe Kongresi duhet të punojnë për të gjetur masat e duhura mbrojtëse.
Qëndrimi i administratës Trump është përplasur me kërkesat e disa drejtuesve të industrisë për masa më të forta sigurie. Mes tyre është edhe drejtori ekzekutiv i Anthropic, Dario Amodei, i cili ka mbështetur kontrolle më të rrepta për të kufizuar rreziqet e teknologjisë.
Trump e quan IA-në “patën e artë”
Presidenti amerikan e sheh inteligjencën artificiale edhe si një motor të rëndësishëm të ekonomisë amerikane. Zhvillimi i sektorit ka nxitur investime të mëdha në qendra të të dhënave dhe ka ndikuar në rritjen e kompanive të teknologjisë dhe tregjeve financiare.
Trump e ka përshkruar IA-në si një “patë të artë” për ekonominë amerikane, duke argumentuar se një frenim i tepruar rregullator do t’i jepte Kinës mundësinë për të kapur avantazhin e SHBA-së.
Nga ana tjetër, shqetësimet për humbjen e vendeve të punës, ndikimin e qendrave të të dhënave në komunitete dhe rreziqet e sigurisë po shtojnë presionin për masa mbrojtëse.
Kongresi pritet të diskutojë rregullat e reja
Debati pritet të zhvendoset edhe në Kongres. Kryetari i Dhomës së Përfaqësuesve, Mike Johnson, ka deklaruar se dëshiron një takim mes Trump, ligjvënësve dhe drejtuesve të industrisë së inteligjencës artificiale për të diskutuar hapat e ardhshëm. Johnson ka paralajmëruar se Kongresi nuk duhet të nxitohet drejt rregullave të ashpra, pasi burokracia e tepërt mund të dëmtojë avantazhin teknologjik të SHBA-së ndaj Kinës.
Edhe udhëheqësi i shumicës në Senat, John Thune, ka mbështetur nevojën për masa mbrojtëse, por ka kërkuar një qasje të kujdesshme dhe jo tepër kufizuese.
Ndërkohë, inteligjenca artificiale pritet të jetë një nga temat e diskutimit në marrëdhëniet SHBA-Kinë. Uashingtoni po përgatitet për bisedime me Pekinin, ndërsa dy fuqitë po garojnë për epërsi në një teknologji që konsiderohet gjithnjë e më e rëndësishme për ekonominë, sigurinë dhe fuqinë ushtarake.
Trump dhe presidenti kinez Xi Jinping kanë diskutuar më herët për masat mbrojtëse ndaj inteligjencës artificiale, ndërsa Kina ka sinjalizuar se është e gatshme të zhvillojë një dialog ndërqeveritar me SHBA-në për këtë çështje.
“`