Ngjarje e rëndë në Itali: Tre persona të dyshuar për grabitje dhe përdhunim ndaj një çifti
Një rast i rëndë grabitjeje dhe përdhunimi ndaj një çifti të ri ka tronditur Italinë. Ngjarja ka ndodhur më 25 tetor në periferi të Romës.
Çifti, dy të rinj italianë të moshës 18 dhe 24 vjeç, kishin ndalur makinën në parkun Tor Tre Teste, në zonën lindore të kryeqytetit, dhe ndodheshin në momente intime, kur u rrethuan papritur nga një grup sulmuesish.
Sipas autoriteteve italiane, sulmuesit thyen xhamin e makinës për të marrë celularin e 18-vjeçares që ndodhej në panel. Më pas, i nxorën me forcë të dy të rinjtë jashtë makinës. Dy prej tyre e mbajtën të palëvizur 24-vjeçarin, ndërsa i treti kryeu aktin seksual ndaj të dashurës së tij para syve të tij. I riu kërkoi ndihmë dhe u lutej sulmuesve të ndalonin, por nuk mundi të çlirohej.
Pas sulmit, autorët u larguan. Çifti, në gjendje shoku dhe konfuzioni, thirri menjëherë policinë.
Tre persona me kombësi marokene janë arrestuar për akuzat e përdhunimit dhe grabitjes. Dy prej tyre u kapën nga njësia “Flying Squad” e Romës pak ditë pas ngjarjes, ndërsa i treti u arrestua në Verona. Lajmi për arrestimet u bë publik sot.
Sipas gazetës La Stampa, të tre të arrestuarit u njohën nga viktimat. Njëri prej tyre u identifikua nga 18-vjeçarja si personi që kreu drejtpërdrejt aktin seksual. Aktualisht, të dyshuarit ndodhen në burg për hetime.
Megjithatë, testet e ADN-së nuk përputhen me personin që viktima tregoi si përdhunuesin kryesor. Gjurmë ADN-je të tre të arrestuarve u gjetën në makinë, duke konfirmuar pjesëmarrjen e tyre në sulmin e rëndë, raporton Corriere della Sera.
Hetimet vazhdojnë për të zbardhur nëse ishin të përfshirë edhe 1-2 persona të tjerë. Telefonat e tre të arrestuarve janë sekuestruar dhe do të analizohen.