Në Serbi, ish-pjesëtari i UÇK-së mbetet në paraburgim pas vendimit të gjykatës së Beogradit.
Gjykata e Beogradit ka vendosur të mbajë në paraburgim për 30 ditë Avni Qenaj, ish-pjesëtar i Ushtrisë Çlirimtare të Kosovës dhe shtetas i Kosovës. Ky vendim është konfirmuar nga avokati i tij mbrojtës, Xhevdet Smakiqi.
Smakiqi e ka cilësuar këtë si një privim të kundërligjshëm të lirisë dhe ka shprehur kritika ndaj mungesës së një presioni diplomatik efektiv nga ana e Qeverisë së Kosovës. Ai ka deklaruar:
- “Në mungesë të një qeverie serioze të Kosovës, vazhdojnë kidnapimet e ish-pjesëtarëve të UÇK-së, sepse Serbia shkel lehtësisht marrëveshjet e Brukselit, ku garantohet liria e lëvizjes dhe të drejtave themelore, duke mos u zbatuar kjo për ish-pjesëtarët e UÇK-së.”
Avokati ka theksuar se Qenaj mbahet në paraburgim pa asnjë provë, ndërkohë që sipas tij, një presion diplomatik efektiv nga Prishtina do të kishte mundësuar lirimin e tij.
Ai ka shtuar se familja e Qenajt po përballet e vetmuar me sfidën e mbrojtjes së të drejtave ligjore dhe lirisë së lëvizjes së të arrestuarit.
- “Familja e Qenaj po kalon këto ditë festive kombëtare nën ankth, pa mbështetjen e shtetit, dhe detyrohet të luftojë vetë përmes angazhimit privat me avokatët e saj,” ka nënvizuar Smakiqi.
Ai e ka përfunduar duke shprehur besimin se pafajësia e Avni Qenajt do të triumfojë, por duke dënuar dështimin e shtetit dhe qeverisë së Kosovës në përmbushjen e përgjegjësive të saj.
- “Liri për Avni Qenaj dhe gëzuar 28 Nëntorin në qelinë e Beogradit, ku po mbahet i kidnapuar në kundërshtim me konventat ndërkombëtare,” ka shkruar ai.