“`html
VIDEO/ Protesta në ditën e 100-të: Qytetarët mblidhen në sheshin “Skënderbej” dhe marshojnë drejt Kryeministrisë
Publikuar më 07.09.2026
TIRANË – Qindra qytetarë janë mbledhur mbrëmjen e sotme në sheshin “Skënderbej” në Tiranë, duke shënuar ditën e 100-të të protestave qytetare kundër qeverisë dhe klasës politike të këtyre 36 viteve të ashtuquajtur tranzicion.
Ngjarja që shkaktoi indinjatë të gjerë dhe konsiderohet si pikënisja e një lëvizjeje të re, ndodhi më datën 30 maj. Një protestues u godit dhe u tërhoq zvarrë nga punonjës të maskuar të një kompanie sigurie në Zvërnec. Kjo ngjarje shndërroi një protestë fillimisht në jugperëndim të Shqipërisë në atë që tani po quhet ‘Revolucioni Flamingo’.
Fillimisht, protesta nisi kundër ndërtimeve në zonat e mbrojtura të Nartës dhe Zvërnecit, projekt i cili përfshinte investime nga Jared Kushner, dhëndri i Donald Trump, dhe e bija e këtij të fundit, Ivanka. Shpejt, protesta mori përmasa të mëdha, duke kulmuar me mbledhjen e mijëra qytetarëve në rrugët e Shqipërisë dhe në diasporë.
Organizatorët kanë bërë thirrje për pjesëmarrje masive, duke e cilësuar këtë ditë si një moment kyç për vijimin dhe përshkallëzimin e protestave.
Pas grumbullimit në sheshin “Skënderbej”, protestuesit janë nisur drejt Bulevardit “Dëshmorët e Kombit”, duke marshuar në drejtim të Kryeministrisë. Me flamuj kombëtarë dhe pankarta në duar, ata kanë shprehur pakënaqësinë ndaj qeverisë. Mes thirrjeve kundër kryeministrit Edi Rama dhe kreut të opozitës, Sali Berisha, janë dëgjuar mesazhe si: “Rama, jep dorëheqjen”, “Largohu”, “Gjithë Shqipëria të urren”, si dhe parulla të përmbledhura si “Rama në burg, Berisha në burg”.
Kërkesat kryesore të protestuesve përfshijnë dorëheqjen e kryeministrit Edi Rama dhe formimin e një qeverie teknike. Organizatorët kanë paralajmëruar gjithashtu vijimin e aksioneve të mosbindjes civile dhe përshkallëzimin e veprimeve qytetare.
Lëvizja “Revolucioni Flamingo”, e pagëzuar zyrtarisht më 31 maj, nisi si një reagim kundër projektit për ndërtimin e një kompleksi luksoz në zonën e mbrojtur Zvërnec-Nartë. Përplasjet e ndodhura në Zvërnec dhe videot e publikuara në rrjetet sociale kontribuan në rritjen e mobilizimit qytetar.
Me kalimin e javëve, protesta u shndërrua në një lëvizje me kërkesa më të gjera politike dhe sociale. Përveç mbrojtjes së zonës së Nartës, protestuesit kanë ngritur shqetësime lidhur me korrupsionin, problemet ekonomike, fenomenin e largimit të të rinjve dhe mënyrën e qeverisjes.
Protesta të ngjashme janë mbajtur gjatë javëve të fundit si në Tiranë, ashtu edhe në qytete të tjera të vendit. Gjithashtu, tubime solidariteti janë organizuar edhe nga shqiptarë të diasporës.
Një qytetar pjesëmarrës në protestën e ditës së 100-të në sheshin “Skënderbej” ka theksuar se shumëllojshmëria e arsyeve e ka shtyrë atë të protestojë kundër qeverisë. Duke komentuar situatën politike, ai akuzoi kryeministrin Edi Rama për keqqeverisje dhe korrupsion, duke e cilësuar si “kryehajdutin e shqiptarëve”.
“Kemi shumë arsye për të cilat protestojmë. Rama është kryehajduti i shqiptarëve. Ai mendon se do të qëndrojë në pushtet deri sa të vdesë. Nuk është e drejtë që një kryeministër i tillë, që nuk ka realizuar asnjë premtim, të qëndrojë kryeministër për 20-30 vite”, u shpreh ai.
“`