Zelensky: Askush nuk mund ta mashtrojë botën përgjithmonë, as Putini
Presidenti ukrainas Volodymyr Zelensky iu drejtua parlamentit irlandez të martën, duke shprehur mirënjohjen për mikpritjen e refugjatëve ukrainas dhe për “mbështetjen e palëkundur” ndaj vendit të tij. Zelensky vlerësoi qëndrimin e qartë të Irlandës në mbrojtje të pavarësisë së Ukrainës dhe në mbështetje të një zgjidhjeje të drejtë për luftën.
“Ju falënderojmë që nuk e keni humbur besimin tek ne, ashtu siç edhe ne nuk e humbim besimin se do të vijë dita kur do t’i mirëpresim të gjithë miqtë tanë në Ukrainë, në paqe,” u shpreh ai.
Kreu i shtetit ukrainas theksoi se një komunitet kombesh është ai që bën paqen “të qëndrueshme”, duke nënvizuar se kur ke vërtet mbështetje ndërkombëtare, “nuk mund të shtypesh dhe të drejtat e tua mund të rikthehen”.
“As Rusia dhe as pak aleatë që ka nuk mund ta shkatërrojnë botën,” tha Zelensky. “Askush nuk mund ta mashtrojë botën përgjithmonë, as Putini. Askush nuk mund të qëndrojë kundër të gjithëve.”
Gjatë fjalimit, ai bëri thirrje për ruajtjen e unitetit europian që u krijua pas vitit 2022 dhe për mbrojtjen e tij. “Memoria njerëzore është e shkurtër dhe vëmendja shpesh e brishtë, ndaj ju lutem t’i kujtoni botës sa herë të jetë e nevojshme se pushtimi rus i Ukrainës është një akt kriminal dhe i pajustifikueshëm agresioni që kërkon drejtësi,” tha Zelensky.
Ai theksoi se Rusia ende përpiqet ta trajtojë Ukrainën si pronë të saj dhe popullin ukrainas “si të ishin në oborrin e pasmë të saj”. Zelensky paralajmëroi se komuniteti ndërkombëtar nuk duhet të lejojë “amnezi” mbi arritjet në rezistencën ndaj agresionit rus.
“Moska nuk mund të besojë se do të shpërblehet për këtë luftë me territore të vjedhura dhe fëmijë të rrëmbyer,” shtoi presidenti ukrainas.