“`html
Një pikë kthese në Amerikë: Zi, protesta dhe paralajmërime në Minneapolis
Gjatë gjithë fundjavës, banorët e Minneapolis u mblodhën në ceremoni përkujtimore, duke vendosur lule dhe postera në kujtim të Alex Pretti, i cili humbi jetën nga plagët e marra nga një oficer federal.
Guvernatori i Minesotës, Tim Walz, iu drejtua përsëri shtypit duke pyetur: “Donald Trump – cili është plani? Çfarë duhet të bëjmë për t’i nxjerrë këta agjentë federalë nga shteti ynë?” Walz u shpreh dukshëm i zemëruar nga justifikimi i administratës Trump për të shtënat e oficerëve federalë si vetëmbrojtje.
Ai shtoi: “Kjo është një pikë kthese, Amerikë. Nëse nuk mund të biem dakord të gjithë se është e gabuar të shpifet ndaj një qytetari amerikan dhe të ndotet gjithçka që ai përfaqësonte. Dhe që ne nuk duhet ta besojmë atë që shohim – atëherë nuk di çfarë tjetër të them.”
“Atë që shohim” – Walz me këtë i referohet videove të incidentit. Ato tregojnë Alex Pretti-n, një infermier i kujdesit intensiv, teksa përpiqej dukshëm të ndihmonte një protestues. Oficerët e Patrullës Kufitare dhe të Imigracionit dhe Doganave (ICE) e rrëzuan atë përtokë, dhe më pas u dëgjuan të shtëna. Pretti dyshohet se ishte i armatosur. Sipas Departamentit të Policisë së Minneapolis, 37-vjeçari ishte pronar i ligjshëm i armëve me leje.
Pamjet bien ndesh me deklaratat e qeverisë amerikane
Megjithatë, asnjë video nuk e tregon Prettin duke nxjerrë armën. Pamjet bien ndesh me atë që Gregory Bovino, një zyrtar i lartë i Patrullës Kufitare, deklaroi të shtunën menjëherë pas incidentit: “Duket se ishte një situatë në të cilën dikush kishte për qëllim të shkaktonte dëme maksimale dhe një masakër kundër forcave të ligjit,” pretendoi Bovino. Sekretarja e Shtetit për Sigurinë Kombëtare, Kristi Noem, foli për terrorizëm të brendshëm.
Të dielën, Bovino ishte disi më i kujdesshëm, duke iu referuar hetimeve që po vazhdonin. Por Noem shtoi në një sqarim në Fox News, se oficerët e policisë federale kishin frikë për jetën e tyre.
Guvernatori i Minesotës u bëri thirrje qytetarëve të qëndrojnë të qetë gjatë protestave. Shteti federal ngriti padi kundër veprimeve të patrullës kufitare dhe policisë së imigracionit. Një seancë dëgjimore është planifikuar për të hënën. Prokurori i Përgjithshëm i Minesotës, Keith Ellison, paralajmëroi: “Nëse nuk e ndalojmë këtë, do të vazhdojë dhe nuk do të jetë mirë për askënd në këtë vend.”
Trump akuzon Demokratët për përçarje
Nuk duket se Donald Trump do të tërheqë forcat federale nga Minesota. Përkundrazi, në platformën Truth Social, Trump u bëri thirrje Walz dhe guvernatorëve e kryetarëve të tjerë të bashkive nga Partia Demokratike të bashkëpunojnë me administratën e tij, në vend që të “nxisin flakët e përçarjes, kaosit dhe dhunës”. Anëtarët demokratë të Kongresit tani po kërcënojnë të bllokojnë projektligjin e buxhetit për të parandaluar fonde shtesë për ICE.
Vendosja e patrullave kufitare dhe policisë së imigracionit në qytetet e qeverisura kryesisht nga Demokratët është pjesë e planit të Presidentit të SHBA-së Donald Trump për të kryer operacionin më të madh të dëbimit në historinë e SHBA-së.
Në Minesota, 37-vjeçari Alex Pretti ishte personi i dytë i vrarë në më pak se tre javë. Më 7 janar, oficerët e Agjencisë së Imigracionit, ICE, qëlluan dhe vranë 37-vjeçaren Renee Good.
“`