Gjykata Supreme rrëzon tarifat doganore të Trump, presidenti i SHBA: Vendim i turpshëm! Kam një plan rezervë
Gjykata Supreme e Shteteve të Bashkuara ka rrëzuar tarifat doganore të vendosura nga presidenti Donald Trump, me një votim prej gjashtë votash pro dhe tre kundër.
Gjyqtarët, të ndarë në votim 6 me 3, vendosën se qasja e presidentit Trump ndaj tarifave për produktet që hyjnë në SHBA nga e gjithë bota nuk ishte e lejuar sipas një ligji të vitit 1977, të quajtur Akti Ndërkombëtar i Fuqive Ekonomike të Emergjencës (IEEPA).
Vendimi bën të pavlefshme disa nga këto tarifa, por jo të gjitha. Trump ende ka mundësinë të kërkojë rivendosjen e disa prej tyre duke përdorur ligje të tjera.
Shtëpia e Bardhë nuk ka bërë ende një koment zyrtar mbi vendimin. Megjithatë, presidenti Trump e quajti atë një “turp” sapo u informua gjatë një takimi me guvernatorët. Sipas një burimi të cituar nga NBC News, presidenti i SHBA ka deklaruar se kishte “një plan rezervë” lidhur me këtë vendim gjyqësor.
Vendimi u hartua nga Kryetari i Gjykatës së Lartë John Roberts, të cilit iu bashkuan tre gjyqtarë liberalë dhe dy kolegë konservatorë, gjyqtarët Neil Gorsuch dhe Amy Coney Barrett, të cilët ishin në shumicë.
“Presidenti pretendon fuqi të jashtëzakonshme për të vendosur në mënyrë të njëanshme tarifa me sasi, kohëzgjatje dhe fushëveprim të pakufizuar,” shkroi Roberts. Por, shtoi ai, administrata Trump “nuk paraqet asnjë statut” ku Kongresi të ketë thënë më parë se gjuha në IEEPA mund të zbatohet për tarifat. Si pasojë, “ne mendojmë se IEEPA nuk e autorizon presidentin të vendosë tarifa,” theksoi Roberts.
Çfarë është Akti Ndërkombëtar i Fuqive të Emergjencës?
Ligji i jep presidentit të SHBA-së autoritetin për të adresuar “kërcënimet e jashtëzakonshme” në rast të një emergjence kombëtare, duke përfshirë “rregullimin e importimit të mallrave të huaja”. Ai u miratua në vitet 1970 për të kufizuar pushtetet presidenciale në çështjet e sigurisë kombëtare, pas tarifave të vendosura nga Richard Nixon për të adresuar krizën e bilancit të pagesave pas rënies së sistemit monetar të Bretton Woods.
Ligji nuk bën asnjë referencë të qartë për tarifat, të cilat, ashtu si taksat, janë prerogativë ekskluzive e Kongresit dhe për të cilat presidentit i janë dhënë vetëm kompetenca të kufizuara.