Eksperimenti: Agjentë të krijuar me IA mund të manipulojnë zgjedhjet
Një debat që duket si një diskutim i vërtetë online gjatë zgjedhjeve, mund të jetë në fakt produkt i Inteligjencës Artificiale (IA). Studiuesit paralajmërojnë se rrjetet e agjentëve të IA mund të bashkëpunojnë për të koordinuar fushata dezinformimi gjatë zgjedhjeve. Këta agjentë mund të mbushin mediat sociale me propagandë, në mënyrë të pavarur dhe në shkallë të gjerë, duke ndikuar kështu opinionin publik.
Eksperiment me ndihmën e Inteligjencës Artificiale
Në një studim të kohëve të fundit, shkencëtarët testuan këtë fenomen në një platformë sociale të simuluar, të ngjashme me platformën X. Ata krijuan 50 agjentë të IA: 40 prej tyre vepruan si përdorues të rregullt, ndërsa 10 të tjerë si operatorë të cilëve u ishte caktuar qëllimi i promovimit të një kandidati fiktiv.
Shkencëtarët testuan tre skenarë:
- Agjentë me një qëllim të vetëm.
- Agjentë që i njihnin shokët e tyre të ekipit.
- Agjentë që mund të planifikonin strategji së bashku.
Rezultati kryesor i eksperimentit ishte se thjesht fakti që agjentët dinin kush ishte pjesë e së njëjtës skuadër, ishte i mjaftueshëm për të krijuar një sjellje të koordinuar, pothuajse aq efektive sa planifikimi i përbashkët. Produkti i simuluar ishte shumë i ngjashëm me bisedat e vërteta online: mendime të ndryshme, përgjigje dhe mbështetje e shtuar rreth një mesazhi të vetëm.
Më efektivë se robotët
Kjo risi dallon dukshëm nga fushatat tradicionale të kryera me ndihmën e robotëve. Metodat e vjetra robotike ndjekin skenarë të thjeshtë si “postoni këtë, ricikloje atë”, duke i bërë më të lehtë për t’u zbuluar. Në krahasim, sistemet e agjentëve të IA ngjasojnë më shumë me përdoruesit e vërtetë.
Rrezik me pasoja ende të paparashikueshme
Edhe pse ky ishte vetëm një simulim, pasojat mund të jenë reale. Sisteme të tilla mund të formësojnë opinionin publik dhe të thellojnë përçarjen në zgjedhjet e ardhshme. Për më tepër, ato mund të jenë shumë më të vështira për t’u zbuluar, sepse nuk bëhet fjalë vetëm për atë që postojnë llogaritë individuale, por edhe për mënyrën se si rrjetet e llogarive veprojnë së bashku. Ende është e paqartë nëse platformat do të jenë në gjendje të përballojnë këtë sfidë. /DW