Aksion i madh në Kosovë, arrestohen 34 persona për lloto dhe skemë piramidale
Një operacion i gjerë policor, i zhvilluar në disa rajone të Kosovës, ka çuar në arrestimin e dhjetëra personave të dyshuar për organizimin e skemave piramidale dhe bixhozit të paligjshëm.
Sipas njoftimit të përbashkët të Policisë së Kosovës dhe Prokurorisë Themelore në Mitrovicë, aksioni është shtrirë në Mitrovicë, Vushtrri, Istog dhe Skënderaj. Gjatë operacionit janë kontrolluar rreth 50 vendodhje të ndryshme, duke përfshirë lokale dhe banesa private.
Janë arrestuar gjithsej 34 persona të dyshuar, ndërsa janë sekuestruar prova materiale të rëndësishme. Këto prova përfshijnë rreth 170 mijë euro para të gatshme, pesë automjete, armë zjarri si dhe pajisje të ndryshme të përdorura në veprimtaritë e dyshuara kriminale.
“Janë arrestuar 34 persona të dyshuar, janë kontrolluar rreth 50 lokacione të ndryshme dhe janë sekuestruar prova materiale që ndërlidhen me veprat penale,” theksohet në njoftim.
Me vendim të prokurorit, 29 nga personat e arrestuar janë dërguar në paraburgim, ndërsa të tjerët janë lënë nën masën e detyrimit për paraqitje.
“Veprime policore në këtë fushëveprim, gjithashtu janë ndërmarrë edhe nga hetimet rajonale dhe stacionet kompetente policore, ku ka pasur rezultate konkrete në parandalim dhe po ashtu arrestim të personave të dyshuar për përfshirje në vepra të ndryshme penale. Në totalin e bastisjeve/kontrolleve dhe arrestimeve janë përfshirë edhe veprimet e ndërmarra policore në Skënderaj, ku janë kontrolluar 15 lokacione të ndryshme, 8 persona janë arrestuar dhe nga ta 4 janë dërguar në mbajtje,” sqarohet më tej në njoftim.
Ky aksion vjen si vazhdimësi e operacioneve të fundit në këtë fushë. Një aksion i mëparshëm në Mitrovicë dhe Vushtrri, sipas njoftimit të Ministrit të Brendshëm, Xhelal Sveçla, rezultoi me arrestimin e 26 personave dhe sekuestrimin e rreth 150 mijë euro.
Autoritetet kanë theksuar se këto operacione përfaqësojnë një angazhim të koordinuar institucional në luftën kundër krimit të organizuar dhe veprimtarive të paligjshme që cenojnë rendin dhe sigurinë publike.