Kremlini përcakton një kusht për zgjidhjen e konfliktit në Ukrainë: Bisedimet e paqes do të mbeten të bllokuara derisa…
Ndihmësi i presidentit rus, Yury Ushakov, deklaroi se ushtria ukrainase duhet të tërhiqet nga Donbasi që procesi i paqes të ecë përpara.
Ai shtoi se bisedimet midis Moskës dhe Kievit do të mbeten të bllokuara deri në plotësimin e këtij kushti, duke theksuar se qeveria ukrainase është e informuar për këtë.
Rusia dhe Ukraina kanë zhvilluar disa raunde bisedimesh që nga fillimi i vitit 2025, pas kthimit të Presidentit Donald Trump në Shtëpinë e Bardhë. Këto bisedime janë zhvilluar edhe me ndërmjetësimin e Shteteve të Bashkuara të Amerikës.
Procesi u ngadalësua pas takimit të fundit të ndërmjetësuar nga SHBA-të në Gjenevë në shkurt. Sipas Ushakov, çdo takim i ri nuk do të ndryshojë situatën nëse trupat ukrainase nuk tërhiqen.
“Derisa Ukraina të bëjë hapin, mund të zhvillohen edhe disa raunde, dhjetëra raunde bisedimesh, por ne do të mbetemi në të njëjtin vend”, tha ai.
“Ata në Ukrainë e dinë se kjo duhet bërë dhe do ta bëjnë herët a vonë”, deklaroi ndihmësi presidencial.
Ushakov gjithashtu theksoi se Moska ruan kontakte të ngushta me Uashingtonin lidhur me procesin e paqes. Ai përmendi se të dërguarit e Trump, Steve Witkoff dhe Jared Kushner, mund të vizitojnë Rusinë “së shpejti”.
“SHBA-të tani janë më të preokupuara me krizën e Lindjes së Mesme, por nuk po e braktisin çështjen e Ukrainës”, tha ai, ndërsa shtoi se Moska dhe Uashingtoni “komunikojnë në mënyrë aktive me telefon”.
Më herët këtë javë, Ushakov e kishte cilësuar tërheqjen e mundshme të Ukrainës nga Donbasi si “një hap serioz” që do të çonte përpara procesin e zgjidhjes. Ai deklaroi të enjten se veprimet ushtarake do të ndërpriteshin pas kësaj.