“`html
Bajerni në kërkim të një qendërmbrojtësi të ri, hedh sytë nga Juventusi
Pas një sezoni thuajse të suksesshëm, Bajerni po planifikon përforcime në skuadër, duke synuar një sulm të fuqishëm në Ligën e Kampionëve. Një ndryshim në mbrojtjen qendrore mund të jetë në horizont. Sipas “Gazeta delo Sport”, drejtuesit e Bajernit kanë shprehur interes për mbrojtësin e Juventusit, Bremer.
Braziliani mund të largohet nga Torino, pasi klubi ka nevojë për të gjeneruar të ardhura nga shitjet, për shkak të mungesës së kualifikimit në Ligën e Kampionëve. 29-vjeçari konsiderohet një aset i vlefshëm për “Zonjën e Vjetër”, por nuk përshtatet plotësisht me planet taktike të trajnerit Luçiano Spaleti.
Raporti vlerëson kartonin e mbrojtësit rreth 40 milionë euro, vlerë e cila mund të rritet edhe më tej pas një Kampionati Botëror të suksesshëm. Klube nga Premier League tashmë kanë shfaqur interes konkret për Bremerin, ndërsa edhe Bajerni po e shqyrton seriozisht mundësinë e transferimit të tij.
Nga ana tjetër, Juventusi ka shprehur interes për Minzhae Kim. Torinezët shpresojnë që shitja e Bremer në Bundesligë mund të hapë rrugën për transferimin e lojtarit të dëshiruar. Kim ka pasur një bashkëpunim të suksesshëm me trajnerin Spaleti gjatë kohës së tyre te Napoli dhe pritet të jetë një figurë kyçe te ekipi i tij aktual.
Skenari i preferuar për Kim është një marrëveshje huazimi. Kohët e fundit ka pasur interes edhe nga klube turke për mbrojtësin. Te Bajerni, Kim ishte zgjedhja e tretë në qendër të mbrojtjes këtë sezon, pas Dajot Upamekano dhe Xhonatan Tah.
Përveç Bremer, kampionët gjermanë po shqyrtojnë edhe opsione të tjera për mbrojtjen, duke përfshirë Josko Gvardiol (Mançester Siti), Ousman Diomande (Sporting Lisbon) dhe Evan N’Dika (AS Roma).
“`