Treguesi i besimit në ekonomi u rrit lehtë në maj, i mbështetur nga ndërtimi dhe shërbimet
Treguesi i ndjesisë ekonomike shënoi një rritje të lehtë prej 1.1 pikësh gjatë muajit maj. Sipas të dhënave të Bankës së Shqipërisë, ky tregues aktualisht ndodhet pranë mesatares së dy viteve të fundit dhe rreth 7 pikë mbi mesataren historike.
Rritja e regjistruar në muajin maj u nxit kryesisht nga përmirësimi i besimit në sektorët e ndërtimit dhe të shërbimeve, si dhe nga rritja e besimit të konsumatorit. Në anën tjetër, një kontribut negativ dha rënia e besimit në sektorin e tregtisë, ndërsa besimi në industrinë nuk pësoi ndryshime të rëndësishme.
Ndërtimi
- Treguesi i besimit në ndërtim u rrit me 0.7 pikë përqindje në maj.
- Aktualisht, niveli i tij është rreth 13.3 pikë përqindje mbi mesataren historike.
- Rritja u ndikua kryesisht nga vlerësimi i përmirësuar i aktivitetit aktual ndërtues, ndërsa vlerësimet për kontratat porositëse patën një kontribut të vogël rënës.
- Pritjet për çmimet në të ardhmen regjistruan një rënie gjatë muajit maj.
Shërbimet
- Treguesi i besimit në shërbime u rrit me 3.4 pikë përqindje në maj.
- Niveli aktual i tij është rreth 12.6 pikë përqindje mbi mesataren historike.
- Ecuria u ndikua pozitivisht nga vlerësimi i bizneseve për nivelin e kërkesës dhe ecurinë aktuale të tyre.
- Pritjet e bizneseve për çmimet në të ardhmen mbetën të pandryshuara.
Industria
- Treguesi i besimit në industri ruajti të njëjtin nivel me muajin paraardhës, duke u pozicionuar rreth 8.3 pikë përqindje mbi mesataren historike.
- Bizneset në industri raportuan një rritje të prodhimit këtë muaj, pavarësisht se kontratat porositëse u vlerësuan në rënie.
- Pritjet e bizneseve për çmimet në të ardhmen regjistruan një rënie.
Tregtia
- Treguesi i besimit në tregti u ul me 3.3 pikë përqindje në maj.
- Niveli i tij aktual është rreth 9.7 pikë përqindje mbi mesataren historike.
- Rënia u shkaktua nga vlerësimet më pak optimiste të bizneseve për ecurinë aktuale të shitjeve, si dhe nga pritjet në rënie për punësimin.
- Pritjet për çmimet në të ardhmen regjistruan një ulje të dukshme, duke ndërprerë një prirje rritëse të dy muajve të mëparshëm.
Besimi konsumator
- Treguesi i besimit konsumator u rrit me 2.5 pikë përqindje në maj.
- Megjithatë, niveli i tij vijon të jetë rreth 2.1 pikë përqindje poshtë mesatares historike.
- Përmirësimi u shkaktua nga rritja në të katër komponentët përbërës: pritjet për gjendjen financiare personale, për situatën ekonomike në të ardhmen, si dhe vlerësimet për blerjet e mëdha aktuale dhe ato të pritshme.