“`html
Bilbilfryrësit: Vetëm 3 subjekte nga 711 njësi raportuan sinjalizime në vitin 2025
Nga 711 njësi përgjegjëse për sinjalizimin dhe mbrojtjen e sinjalizuesve, në fund të vitit 2025, vetëm tre subjekte raportuan raste konkrete sinjalizimi gjatë vitit. Këto të dhëna rezultojnë nga raporti vjetor i Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI).
Raporti thekson se nga numri total i njësive përgjegjëse, 185 funksiononin në sektorin publik dhe 526 në sektorin privat.
Gjatë vitit 2025, ILDKPKI ka vazhduar monitorimin e institucioneve publike me mbi 80 punonjës dhe organizatave private me mbi 100 punonjës, për ngritjen dhe raportimin e njësive përgjegjëse. Ky proces është zhvilluar në bashkëpunim me Drejtorinë e Përgjithshme të Tatimeve.
Inspektorati raporton se ka përfunduar procesin e rishikimit të Regjistrit Kombëtar të Njësive Përgjegjëse në autoritetet publike dhe në sektorin privat. Ky regjistër pasqyron të dhënat dhe funksionet e personave të ngarkuar me zbatimin e ligjit për sinjalizimin dhe mbrojtjen e sinjalizuesve.
Nga 174 raporte vjetore të administruara nga njësitë përgjegjëse në sektorin publik, 157 janë paraqitur brenda afateve ligjore. Vetëm dy njësi përgjegjëse kanë regjistruar dhe trajtuar raste sinjalizimi gjatë vitit 2025:
- Një rast është raportuar nga Njësia Përgjegjëse e Sinjalizimit pranë Inspektoratit Shtetëror Teknik Industrial. Pas përfundimit të hetimit administrativ, nuk rezultoi të ishte kryer ndonjë shkelje ligjore.
- Rasti i dytë është raportuar nga Njësia Përgjegjëse e Sinjalizimit pranë Bashkisë Lushnjë, e cila ka regjistruar një sinjalizim dhe ka vendosur mosfillimin e hetimit administrativ.
Në sektorin privat, ILDKPKI ka administruar 277 raporte vjetore, nga të cilat 233 janë paraqitur brenda afateve ligjore. Vetëm një njësi përgjegjëse ka raportuar raste sinjalizimi. Sipas raportit, “Sisal Albania” sh.p.k. ka raportuar 13 raste sinjalizimi gjatë vitit 2025. Për gjashtë prej tyre ka përfunduar hetimi administrativ, ndërsa shtatë raste vijojnë të jenë në proces hetimi.
Në total, tre subjektet raportuan 15 raste sinjalizimi përmes mekanizmave të brendshëm gjatë vitit 2025.
Përmes mekanizmit të jashtëm të raportimit, ILDKPKI ka regjistruar dhe trajtuar 11 raste sinjalizimi dhe tetë kërkesa për mbrojtje nga hakmarrja gjatë vitit raportues. Këto sinjalizime dhe kërkesa lidhen kryesisht me institucione të administratës publike në nivel qendror dhe vendor, si dhe me institucione të tjera të sektorit publik, përfshirë institucionet e pavarura dhe ato të arsimit të lartë.
Objekti i sinjalizimeve përfshin dyshime për konflikt interesi, parregullsi në ushtrimin e funksioneve publike, shkelje të procedurave të prokurimit publik, raste të mundshme të falsifikimit të dokumenteve zyrtare, si dhe çështje që lidhen me marrëdhëniet e punës dhe mbrojtjen e sinjalizuesve nga hakmarrja.
Raporti evidenton gjithashtu se gjatë vitit 2025 janë vendosur tetë gjoba ndaj organizatave që nuk kanë përmbushur detyrimin ligjor për krijimin dhe raportimin e njësive përgjegjëse. Për periudhën 2016-2025, ILDKPKI ka vendosur gjithsej 237 masa administrative ndaj organizatave që nuk kanë respektuar këtë detyrim.
“`