Armëpushimi në Gaza vazhdon, por sulmet izraelite marrin jetën e nëntë personave, përfshirë dy fëmijë
Nëntë palestinezë kanë humbur jetën si pasojë e sulmeve ajrore dhe të shtënave me armë zjarri të kryera nga ushtria izraelite në Rripin e Gazës, sipas zyrtarëve palestinezë të shëndetësisë.
Mjekët raportojnë se një sulm ajror i kryer të mërkurën goditi një zonë pranë një shkolle në qytetin e Gazës, duke shkaktuar vdekjen e një personi. Një tjetër sulm ajror izraelit goditi një tendë që strehonte persona të zhvendosur në zonën al-Mawasi të Khan Younis, duke rezultuar në vdekjen e katër personave, mes tyre edhe një fëmijë 10-vjeçar.
Më vonë gjatë ditës, autoritetet palestineze të shëndetësisë njoftuan vrasjen e një djali gjashtëvjeçar nga të shtënat izraelite në lagjen Zeitoun të qytetit të Gazës. Sulme të tjera të ushtrisë izraelite në zona të ndryshme të qytetit të Gazës lanë të vdekur edhe tre persona të tjerë, ndërkohë që disa të tjerë mbetën të plagosur.
Pavarsisht raportimeve për një armëpushim në fuqi në Gaza, sulmet dhe viktimat vazhdojnë. Përpjekjet për arritjen e një marrëveshjeje përfundimtare për t’i dhënë fund konfliktit mbeten të bllokuara.
Sipas Ministrisë së Shëndetësisë në Gaza, të paktën 1,084 palestinezë janë vrarë që nga hyrja në fuqi e armëpushimit në tetor. Këto shifra nuk janë verifikuar në mënyrë të pavarur.