Huthët kërcënojnë Arabinë Saudite me “rrethim” / Frikë për rikthimin e luftës në Jemen
Një zyrtar i lartë i rebelëve Huthi në Jemen ka paralajmëruar për sulme kundër Arabisë Saudite, duke shtuar shqetësimet për rikthimin e konfliktit të ngrirë prej vitesh në Jemen në një luftë të gjerë.
Duke folur për Al Jazeera, anëtari i byrosë politike të Huthëve, Mohammed al-Bukhaiti, deklaroi se grupi do të hakmerret ndaj asaj që ai e cilësoi si përpjekje saudite për të penguar lëvizjen ajrore në Aeroportin Ndërkombëtar të Sanaas. “Gatishmëria e tyre për të sulmuar Aeroportin e Sanaas për të penguar mbërritjen ose nisjen e fluturimeve i jep Jemenit të drejtën për të sulmuar aeroportet e tyre dhe për t’u imponuar atyre një rrethim, ashtu siç na kanë bërë neve,” tha al-Bukhaiti.
Kërcënimet erdhën pas një sulmi ndaj pistës së Aeroportit të Sanaas. Huthët akuzuan Arabinë Saudite për sulmin, ndërsa qeveria e Jemenit, e njohur ndërkombëtarisht, mori përgjegjësinë, duke pohuar se operacioni kishte për qëllim ndalimin e uljes së një avioni iranian në kryeqytetin e kontrolluar nga rebelët.
Zëdhënësi ushtarak i Huthëve, Yahya Saree, theksoi se sulmi shënoi fundin e periudhës së “çtensionimit” dhe paralajmëroi për masa të tjera hakmarrëse. Pas sulmit në Sanaa, rebelët Huthi lëshuan një seri raketash balistike drejt Aeroportit Ndërkombëtar të Abhas, në jug të Arabisë Saudite. Koalicioni i udhëhequr nga Riadi njoftoi se raketat u kapën dhe u neutralizuan.
Tensionet u përshkallëzuan pas një fluturimi iranian drejt Sanaas më 3 korrik, i pari i bërë publikisht nga Irani në kryeqytetin jemenas prej më shumë se një dekade. Huthët pretenduan se avionët luftarakë sauditë tentuan të pengonin uljen e tij.
Nga ana tjetër, qeveria jemenase ka akuzuar Iranin se po përdor fluturimet civile si mbulesë për furnizimin e rebelëve me pajisje dhe mbështetje ushtarake. Ambasadori i Jemenit në Kombet e Bashkuara, Abdullah al-Saadi, deklaroi se avioni iranian ishte i lidhur me Gardën Revolucionare Islamike të Iranit (IRGC) dhe transportonte “personel, njohuri dhe pajisje ushtarake”.
Përplasjet e fundit vijnë pas një periudhe relative qetësie në Jemen, pas armëpushimit të arritur rreth katër vite më parë. Analistët paralajmërojnë se përshkallëzimi mes Huthëve dhe Arabisë Saudite mund të rikthejë një konflikt të gjerë në një nga rajonet më të destabilizuara të Lindjes së Mesme.