“`html
Plotësohet drejtimi i ASD-së, Pamela Qirko emërohet Zv/drejtore e Përgjithshme
Agjencia e Sigurimit të Depozitave (ASD) pritet të plotësojë këtë muaj strukturën e saj drejtuese ekzekutive. Pas emërimit të Drejtorit të ri të Përgjithshëm, Mina Kusta, Këshilli Drejtues pritet të emërojë edhe Zëvendësdrejtoren e Përgjithshme të agjencisë. Në këtë detyrë pritet të emërohet Pamela Qirko.
Pamela Qirko është juriste me profesion. Nga viti 2017 deri në vitin 2023 ajo ka mbajtur detyrën e Anëtares dhe Kryetares së Komisionit të Pavarur të Kualifikimit, i njohur ndryshe si komisioni i vetting-ut për gjyqtarët dhe prokurorët. Më herët, CV-ja e saj tregon një eksperiencë të gjatë në kompaninë Telekom Albania/Albanian Mobile Communications (AMC). Nuk rezulton që ajo të ketë pasur eksperienca të mëparshme në sektorin financiar.
Ajo kishte aplikuar për t’u emëruar gjyqtare në Gjykatën e Apelit të Juridiksionit të Përgjithshëm, Tiranë, por kërkesa e saj u rrëzua këtë muaj nga Këshilli i Lartë i Drejtësisë.
Sipas statutit të ASD-së, Zëvendësdrejtori i Përgjithshëm propozohet nga Drejtori i Përgjithshëm dhe emërohet nga Këshilli Drejtues i institucionit. Këshilli Drejtues përbëhet nga pesë anëtarë: dy emërohen nga Banka e Shqipërisë, dy nga Ministria e Financave dhe një nga Instituti i Ekspertëve Kontabël të Autorizuar (IEKA).
Emërimi i Pamela Qirkos pason atë të Drejtorit të ri të Përgjithshëm, Mina Kusta. Ai u emërua në këtë detyrë dy muaj më parë nga Banka e Shqipërisë. Pozicioni kishte qëndruar vakant që nga korriku i vitit 2025, kur përfundoi mandati i drejtuesit të mëparshëm, Genc Mamani.
Që prej vitit 2013, Mina Kusta ka punuar pranë Albcontrol (Ofruesi i Shërbimeve të Lundrimit Ajror të Shqipërisë), fillimisht si Drejtor Ekonomik dhe më pas, në periudhën 2019-2021, ka mbajtur postin e Drejtorit të Përgjithshëm të këtij enti.
Ndryshimet në drejtimin e ASD-së vijnë në një moment ku pritet të bëhen ndryshime të rëndësishme në ligjin organik të këtij institucioni. Këto ndryshime, mes të tjerash, do të synojnë rritjen e shumës së sigurimit të depozitave bankare në Shqipëri, duke e afruar atë me nivelin e Bashkimit Europian.
Me ligjin aktual, ASD-ja siguron depozitat bankare deri në shumën e 2.5 milionë lekëve dhe depozitat në shoqëritë e kursim-kreditit deri në shumën e 2 milionë lekëve. Direktiva e Bashkimit Europian 49/2014 parashikon që vlera e sigurimit të depozitave në vendet anëtare të jetë të paktën 100 mijë euro.
Megjithatë, një rritje e menjëhershme dhe katërfishe e nivelit maksimal të mbulimit të depozitave do të ishte e vështirë. Për këtë arsye, ASD-ja ka projektuar një rritje në dy etapa. Me ligjin e ri “Për sigurimin e depozitave”, që parashikohet të dërgohet për miratim brenda vitit 2026 ose në fillim të vitit 2027, do të ketë një rritje të ndërmjetme të shumës së mbulimit të depozitave, nga 2.5 milionë lekë në 6 milionë lekë. Në një etapë të dytë, në momentin e anëtarësimit në Bashkimin Europian, shuma maksimale e sigurimit të depozitave do të rritet në kufirin e parashikuar në direktivë, prej 100 mijë eurosh.
“`